CEBU, Philippines - Gihagit ni independent gubernatorial candidate Boyet Cortes ang iyang mga kaatbang sa politika sa usa ka debate bisan kinsa nila ni One Cebu gubernatorial candidate Pablo John Garcia ug Liberal Party standard bearer Hilario Junjun Davide III.
Matud ni Cortes atol sa interbyu sa DyDD dili siya mosibog og debate batok nila ni Garcia ug Davide sa bisan unsang isyo ilabina sa kontrobersyal nga Balili property ug bisan unsang orasa.
Si Cortes nipadayag sa iyang kasubo may labot ning pagbalosbalos lang og pamahayag sa kampo ni Garcia ug Davide sa kontrobersiya sa Balili property pagkakarun tungod kay dili kini maoy tubag sa panginahanglan sa mga Sugboanon.
Dugang ni Cortes gikinahanglan ang maong debate sa mga kandidato aron mahibaw-an sa publiko kun si kinsa nila ang dunay seryoso nga plataporma de gobiyerno.
Matud ni Cortes wala siya mabalaka nga way kompletong line-up tungod kay direkta sa mga kapitan sa barangay ug botante ang iyang koneksyon.
Si Cortes naila sa bansag nga 'classmate' tungod sa iyang blocktime nga programang pang-agrikultura ug pamuhi og hayopan nga kinaham sa mga mag-uuma diha sa ABS-CBN matag Domingo nga Let's Do Business.
Niadtong miaging adlaw si Cortes misalmot og business forum nga gipahigayon sa usa ka dakong hotel dinhi sa dakbayan nga gitumong paghiusa sa tanang negosyante dinhi sa Central ug Eastern Visayas.( /EIM) (BANAT NEWS)