Mabdos nalatayan og trak

CEBU, Philippines -  Usa ka ginang nga lima ka buwang mabdos ang nalatayan sa ubos nga bahin sa iyang lawas og dumptruck nga nagkarga og anapog kagahapon sa hapon diha sa national highway sa sitio Catadman sa barangay Sabang syudad sa Danao.      

Ang mabdos mao si Lani Pasahe, 25, molupyo sa barangay Guinsay sa maong syudad kinsa atol ning pagsulat sa balita gitabang pa sa tambalanan sa Perpetual Soccour Hospital.           

Sa pakighinabi sa Banat News ni Danao City Traffic Division PO1 Rommel Costa misaysay nga ang biktima sakay sa usa ka motorsiklo nga gimaneho sa bana niining si Jimmy patubang sa ilang panimalay.           

Sa diha nga naabot kini sa maong lugar gikatahong adunay kalit milabang nga batan-ong si Dioneda Lauron, 17, ug nadumbolan kini apan tungod sa kakusog sa pagbangga nalagpot ang mabdos nga si Pasahe pagkatumba sa ilang motorsiklo diha sa dalan.           

Matud pa nga gibanabanang lima ka metros ang gilagpotan ni Pasahe ug mitugpa sa pikas lane nga pababag ug nahapla sa karsada, natunong usab nga maoy pag-agi sa dumptruck nga nagsunod nga gimaneho ni Marito Capua ug wala na makahunong pa hinungdan nga nalatayan gyud sa mga ligid niini ang ginang.          

Dali kining gidala sa Danao District Hospital ug gibalhin kini ngadto na sa Perpetual Soccour.

Matod pa ni Costa nga anaa sa kritikal nga kahimtang ang mabdos ug gani,  gihulagway ni Costa nga posibling mabugtuan gayud sa kinabuhi ang biktimang mabdos tungod sa grabing kadaot sa lawas nga naangkon niini.           

Samtang ang menor de edad nga nabanggaan sa magtiayon nadala usab sa usa ka tambalanan sa dakbayan sa Sugbo.            Nasayran usab nga ang maong dumptruck giingong gipanag-iya ni Compostela Mayor Joel Quiño apan dili kini government owned vehicle, wala pa hinuon makompirmar ang maong impormasyon gikan sa independenteng source. (EIM) (BANAT NEWS)