CEBU, Philippines - Gibasura ni Associate Prosecution Attorney II Van Russell Inopiquez ang kasong Unjust Vexation in Relation to 7610 nga gisang-at sa usa sa mga ginikanan sa tinun-an sa Saint Theresa’s College nga wala gipapaso sa ilang gradwasyon niadtong buwan sa Marso ning tuiga.
Sa desisyon nga gipakanaog ni Inopiquez ug gi-aprobahan usab ni City Prosecutor Nicolas Sellon, nasuta nga walay igong basehan nga nagpamatuod nga ang tunghaan nagmando sa mga gwardiya nga pasirad-an ang gate.
Gawas niini, wala usay basihan nga nagmando ang tunghaan nga sila dili pasudlon aron dili makaapil sa commencement exercises niadtong buwan sa Marso.
Sa nasayran, ang maong tunghaan wala motugot nga makapaso ang lima ka mga tinun-an sa ilang graduation rites gumikan sa katarungan nga kuno nakalapas ang mga hingtungdan sa rules and regulation sa maong tunghaan.
Samtang ang nagpabilin nalang karon nga mipadayon sa pakigbisog sa maong kaso mao ang duha ka tinun-an.(/WC) (BANAT NEWS)