CEBU, Philippines - Usa ka wala mailhing lalaki nga gituohang tiggamitan og ginadiling drugas ang gipusil patay pasado ala-una sa kaadlawon diha sa sitio Lawis-Alaska sa barangay Mambaling, dakbayan sa Sugbo.
Ang biktima gihulagway nga anaa sa 35-anyos, 5’6 ang gitas-on, semi-opaw ug adunay tattoo nga ‘ALLAN’ sa likod nga bahin sa iyang lawas ug nagsul-ob og puti nga t-shirt ug checkered nga short pants.
Sa imbestigasyon sa Homicide Section nasayran nga ang biktima nagsakay sa usa ka traysikad nianang tungora dihang kalit gibabagan sa wala mailhing lalaki ug gipusil kini makadaghang higayon.
Nakahimo pa paglayat gikan sa traysikad ang biktima apan nahagba ra gihapon kini ug nakabsan sa kinabuhi. Ang biktima nakaangkon og samad pinusilan sa ulo, likod ug sa iyang dughan.
Matud pa ni PO2 Nilo Aventurado, sa Homicide Section sa Cebu City Police Office nga hangtod karun wala pay mikuha sa lawas sa biktima ug padayon pa sila pagpangita og lead sa maong kaso.
Apan dako ang pagduda ni Aventurado nga tiggamitan og ilegal nga drugas ang biktima. Nakuha gikan sa biktima ang usa ka lighter, gunting, upat ka sim packs, papel ug sensilyo. (/EIM) (BANAT NEWS)