CEBU, Philippines - Usa ka gidudahang kawatan ang naangol human mapusili sa kagawad sa barangay Duljo-Fatima dihang ang suspek gikatahong mikulata sa babayeng tag-iya sa tindahan nga iyang gikawatan.
Sumala pa sa imbestigasyon sa Homicide Section ang napusilan mao si Rochele Pateres Camuta, 23-anyos kinsa naigo sa iyang hawak ug gidala sa Cebu City Medical Center sa nakapusil kaniyang si barangay kagawad Jesus Alicata.
Matud sa imbestigasyon nga pasado alas-3 sa kaadlawon dihang nagkaguliyang sa usa ka tindahan sa dalan T.Padilla sa maong barangay gumikan sa giingong pagsulod ni Camuta sa tindahan nga gipanag-iya ni Leslee Miñoza Lapuz.
Apan matud pa nga nasakpan ni Lapuz si Camuta diha sa sulod sa ilang tindahan ug dihang gikomprontase nasuko pa hinuon kini ug imbes nga modagan gikatahong mipunit og botelya si Camuta ug gibunalbunalan ang babaye.
Si Lapuz nagsiyagit nga nagpakitabang sa mga silingan nga nakapapugwat gikan sa pagkatulog sa silingang si kagawad Alicata kinsa daling miresponde. Sumala pa nga pagkakita sa suspek kang Alicata dali kining midagan ug giingong misuway pa og ibot sa gidalang .38 kalibre rebolber hinungdan nga giunhan kini pagpusil ni Alicata gamit ang usa ka kalibre .45 pistola.
Ang suspek daling gidala sa CCMC ug pagkahuman mitahan sa Mambaling Police Station si Alicata. Gisusi pa sa mga imbestigador kung dunay lisensya ang armas sa kagawad ug ni Camuta. (EIM) (BANAT NEWS)