CEBU, Philippines - Gilugwayan sa siyudad sa Mandaue ang pagpasira sa mga stalls sa sulod sa bag-ong merkado publiko sa sitio Tribunal sa barangay Centro sa dakbayan sa Mandaue.
Ang pagpasira unta sa ilang mga tindahan bunga kini sa kakulang sa ilang mga rekisitos aron makapaninda.
Si Musolini Suliva, ang market administrator sa bag-ong merkado publiko sa maong dakbayan mibutyag sa mga tigbalita nga dunay mga vendors pa nga wala makasumiter sa ilang mga rekisitos samtang ang uban hinayhinay nang mitunol niini sa ilang buhatan.
Lakip sa gipangayong rekisitos mao ang ilang abangan sa matag stalls ug mga business permits ug uban pa.
Matud pa ni Musolini nga gikan sa 619 ka mga stalls nga ilaha untang sirad-an 400 na lang ang wala pa makahatag sa ilang rekisitos.
Si Fe Arisgado nga maoy chairman sa Mandaue Vendor Multipurpose Cooperative (MAVENCO) mipasabot nganong daghang vendors ang wala dayon makahatag sa mga gipangayong rekisitos sa siyudad.
Matud niya nga hinay pa ang halin ug naglisod ang mga vendors nga makahalin og dako tungod kay bag-o pa ang merkado. (/EIM) (BANAT NEWS)