CEBU, Philippines - Usa ka 17-anyos nga katabang ang mipasangil sa 80-anyos niyang agalong lalaki nga milugos kaniya sumala pa sa hepe sa La Paz Police Station nga si Chief Inspector Alexander Rosales.
Si Rosales miingon nga ang biktima nga residente sa usa sa mga barangay sa maong lungsod midangop sa ilang buhatan uban sa mga ginikanan niini niadtong Nobiyembre 2 ug misumbong nga kini gilugos sa iyang agalong lalaki niadtong Oktubre 19.
Ang biktima napulo pa lang ka adlaw nga nagtrabaho sa banay sa iyang agalon diha sa Luna Street sa La Paz. Matud pa sa biktima nga wala na siya mosukol pa sa gihimo sa suspek tungod sa kahadlok niyang mamatay unya ang suspek sanglit dihang iyaha kining gitukmod giatake kini dayon sa hubak.
“She was afraid that something bad might happen to the suspect. This allegedly forced her not to resist on the sexual advances of the old man,” matud pa sa kapolisan.
Human sa hitabo matud pa gisugo pa sa suspek ang biktima sa pagkuha sa tambal niini sa hubak. Gibutyag usab sa biktima nga wala siya hulgaa sa suspek gawas lang sa pag-ingon nga kinahanglang dili niya ipanabi ang nahitabo kanila. Matud pa sa biktima nga sa wala pa mahitabo ang paglugos, gihatagan siya sa suspek og kwarta aron pang-grocery ug mihaylo kaniyang magpa-dental checkup. Ang maong suspek giingong nanag-iya og mga apartment ug nagpuyong nag-inusara gawas lang sa tulo niini ka mga katabang.
Ang biktima misumbong unta sa mga kaubang katabang apan giingnan lang siya sa duha nga pasagdan na lang ang nahitabo total tiguwang naman ang ilang agalon. Apan mibiya ang biktima sa iyang trabaho ug mipauli ug misumbong ngadto sa iyang ginikanan. Gitambagan sa polis ang biktima nga magpakurasyon aron isuporta sa kasong ila unyang ipasaka.( EIM)(BANAT NEWS)