CEBU, Philippines - Ang chairman sa Cebu City Solid Waste Management Board nga si Atty. Jade Ponce nagkanayon ilahang iinsister ngadto sa konseho ang sugyot nga sagupon sa siyudad ang gihimo sa ubang lokal nga mga kagamhanan kabahin sa ilang programang paghimo sa basura nga tinubdan sa enerhiya.
Kahinumduman nga taudtaud na nga nag-ung-ong sa konseho ang maong sugyot nga nauyonan sa Solid Waste Management Board , giingong walay magasto ang siyudad niini.
Matud pa ni Ponce nga parte kini sa Private Public Partnership (PPP) program sa siyudad gani nakakuha na kini og permit sa United Nations.
Gani ang kompanya nga maoy moumol niini nga Greenergy Solution Incorporated mipasalig nga dili maapektohan ang panginabuhian sa kapin sa 300 ka mga mamunitay og basura diha sa Inayawan Sanitary Landfill sa higayon nga maimplementar ang proyekto sa kagamhanan ug sa maong pribadong kompanya nga himuon kining energy plant area.
Nasayran nga moabot ngadto sa 400 ka mga trabahante ang kuhaon aron makatrabaho sa maong planta maong kuwangon ra ang kasamtangang 300 ka mamunitay og basura sa Inayawan aron mahatagan og desenteng trabaho.
Masaligon si Ponce nga ang maong programa makatabang kini sa kalikupan ug mapapas na unya ang mga reklamong mangalisbo diha sa South Road Properties (SRP) ang baho sa basura gikan sa Inayawan. (/EIM) (BANAT NEWS)