Gin Kings puro na sa semis ticket
MANILA, Philippines — Lagpas isang kahong beer ang ibinuhos ng Barangay Ginebra laban sa San Miguel, 126-99, para tagayin ang 2-0 lead sa PBA Season 50 Governors’ Cup quarterfinals series kahapon sa Ninoy Aquino Stadium.
Lumagok ng 34-21 bentahe ang Gin Kings sa first quarter at hindi na nagpaawat patungo sa pambihirang 27-puntos na tagumpay.
Halos triple-double na 33 puntos, 10 rebounds at 9 assists ang kinolekta ni import Jordan Murphy upang trangkuhan ang bigating panalo ng Ginebra na pinapatunayang sila pa rin ang kampeon ng Commissioner’s Cup kahit pa wala ang resident import na si Justin Brownlee.
May ambag ding 22 at 19 puntos sina RJ Abarrientos at Stephen Holt, ayon sa pagkakasunod, habang kumamada din ng muntikang triple-double na 12 puntos, 11 assists at 7 rebounds si Scottie Thompson.
“Everyone is as surprised as I am. We didn’t even dream to be 1-1, much more to be 2-0. We’re definitely in a roll. Our offense is clicking and we’re locked in defensively,” ani coach Tim Cone.
Nauna nang binulaga ng Ginebra, No. 3. seed ng Group B, ang Group A No. 1 seed SMB bitbit ang 104-95 panalo sa Game 1.
Tatlong beses lang natalo ang Beermen sa elims at ngayon ay nadalawahang sunod na sila ng Gin Kings upang mamuro na sa puwesto sa semifinals.
Llamado ngayon ang rematch ng Ginebra sa TNT na may 2-0 kartada rin sa Magnolia sa kabilang bracket.
Lumobo ng hanggang 33 puntos ang kalamangan ng Ginebra sa kapatid subalit mahigpit nitong karibal na SMB.
- Latest
