Responders sa Mandaue gipaubos sa WASAR training

CEBU, Philippines — Gipalig-on sa Dakbayan sa Mandaue City ang kapasidad sa pagtubag sa mga emerhensiya kalabot sa tubig human malamposong nakahuman ang 27 ka responders sa lima ka adlaw nga Water Search and Rescue (WASAR) training.

Ang pagbansay gitumong sa paghatag og dugang kahibalo ug kahanas sa responders aron makahimo sila og operasyon sa pagpangita ug pagluwas sa mga tawo bisan sa lisod nga kahimtang sa katubigan.

Ang mga trainee gikan sa Mandaue City Disaster Risk Reduction and Management Office (MCDRRMO) ug Emergency Response Team (ERT) sa Barangay Opao niapil sa pagbansay nga gipahigayon gikan Oktubre 19 hangtud sa 23, 2026 diha sa The Mark Resort sa Dakbayan sa Lapu-Lapu.

Isip kataposang hagit sa pagbansay, gikinahanglan sa mga trainee nga molangoy og usa ka milya ug ipakita ang mga paagi sa pagluwas nga ilang nakat-onan.

Mas nahimong lisod ang hagit tungod sa dili maayong kahimtang sa panahon ug dagkong mga balod nga ilang giatubang atol sa paglangoy.

Sa 40 ka trainee nga niapil, 27 ang nakatuman sa mga kinahanglanon sa pagbansay ug nakadawat sa ilang mga sertipiko. Pinaagi sa maong pagbansay, gitinguha nga mapalambo ang kapasidad sa responders sa pagdumala sa mga emerhensiya sa katubigan lakip na ang pagpangita ug pagluwas sa mga tawo panahon sa kalamidad ug uban pa’ng insidente.

Nagpasalamat si MCDRRMO Chief Buddy Ybañez sa mga trainee nga nilahutay bisan pa sa kakapoy ug kalisod sa mga hagit nga ilang giatubang.

Gipasalamatan usab niya si Mayor Thadeo “Jonkie” Ouano sa padayon nga pagsuporta sa mga programa nga nagtumong sa pagpalambo sa kaandam ug kapasidad sa emergency responders sa siyudad.

Lakip sa iyang gipasalamatan ang mga trainee sa Philippine Coast Guard (PCG) tungod sa paggiya ug pagtabang kanila sa tibuok pagbansay. (BANAT NEWS)