Bus nadisgrasya, duha naangol

CEBU, Philippines — Duha ka pasahero ang naangol human ang gisakyan nilang bus gikatahong nikagar ang brakes ug nitapsing sa kilid sa dalan sa Barangay Liki, lungsod sa Sogod, amihanang Sugbo, alas-8:50 sa buntag niadtong Sabado, Oktubre 24.

Ang mga naangol giila lamang sa mga alyas nga Jessie, 28, ug Rina, 31. Gidala sila sa Juan Dosado Memorial Hospital sa Barangay Damolog, Sogod, alang sa pagpatambal.

Base sa inisyal nga imbestigasyon sa Sogod Municipal Police Station, ang bus gikan sa Maya Port sa Daanbantayan paingon sa Dakbayan sa Sugbo ug sa nagsubay kini sa tungason nga bahin sa Barangay Liki.

Giingong nipalyar ang brakes sa bus ug nawad-an og kontrol ang drayber.

Mitabok ang sakyanan sa pikas lane sa wala pa mibangga sa bakilid daplin sa dalan. Ang bus gimaneho sa 48-anyos nga si Josue, usa ka lumad sa Balilihan, Bohol. Nagsakay niini ang 28 ka tawo, lakip ang konduktor. Sumala sa report sa kapulisan, naguba ang bus tungod sa kusog sa pagbangga.

Gidala sa police custody ang drayber samtang nagpadayon ang imbestigasyon aron mahibal-an ang eksaktong hinungdan sa aksidente.

Matud sa report ,napugos ang drayber pagbangga sa bus aron dili mosangpot sa mas grabeng disgrasya aron masiguro ang kaluwasan sa mga pasahero. (BANAT NEWS)