Wala maliquidate nga cash advances sa Mandaue gikwestyon

CEBU, Philippines — Ang cash advances nga mokabat sa P15.99 milyon nga gihatag sa mga opisyal ug empleyado sa Mandaue City Government wala pa maliquidate hangtod Disyembre 31, 2025.

Lakip ang P2.56 milyon nga kapin na sa 10 ka tuig nga wala pa masettle, sumala sa Commission on Audit (COA).

Sa 2025 annual audit report, giingon sa COA nga ang kapakyasan sa pagliquidate sa cash advances bisan nahuman na ang ilang gituyo nga katuyoan supak sa Section 89 sa Presidential Decree 1445 ug COA Circular No. 97-002, nga naglatid sa mga lagda ug takdang panahon sa pagliquidate niini.

Sa kinatibuk-ang P15.99 milyon nga wala pa maliquidate, P15.65 milyon ang cash advances ubos sa General Fund, P324,922.10 ubos sa Special Education Fund, ug P17,157.99 nga payroll advances ubos sa General Fund.

Sa aging analysis sa COA, P12.76 milyon niini wala pa masettle sulod sa wala pay usa ka tuig, samtang P407,185.46 ang wala pa maliquidate sulod sa kapin usa hangtod lima ka tuig. Aduna usab P269,336.39 nga kapin lima hangtod 10 ka tuig nang wala masettle.

Matud sa COA, ang dugay nga pagkapakyas sa pagliquidate mahimong moresulta sa sobra nga pagrekord sa receivables ug kulang nga pagrekord sa katugbang nga mga gasto sa financial statements.

Namatikdan usab sa audit team nga duha sa mga accountable officers nga adunay wala pa masettle nga balanse gikumpirmang namatay na sa Local Civil Registrar.

Girekomenda sa COA nga ipadayon sa siyudad ang pagpangita ug pagpadala og demand letters ngadto sa mga opisyal ug empleyadong adunay dugay nang wala maliquidate nga cash advances, ilabina kadtong nagserbisyo pa sa gobyerno.

Gisugyot usab niini ang paggamit sa angay nga legal nga mga lakang alang sa dagkong balanse ug ang paghunahuna sa pag-write off sa dormant accounts subay sa COA Circular No. 2023-008.

Apan, gitaho sa city management nga dako na ang pagkunhod sa wala pa maliquidate nga cash advances. Sa sinulat nga tubag sa city accountant niadtong Marso 23, 2026, miabot na lang sa P3,462,370.01 ang nahibiling balanse niadtong Enero 31, 2026, gikan sa P15.99 milyon sa kataposan sa 2025.

Matud sa management, padayon silang nagpadala og demand letters ug pahimangno ngadto sa mga aktibong empleyado, lakip ang pasidaan nga mahimong pugngan ang ilang sweldo kon mapakyas silang mag-liquidate.

Atol sa exit conference, gipahibalo sa management nga gipatuman na ang ubang rekomendasyon sa COA, apan wala pa nila mahunahuna ang pag-write off sa mga dormant accounts nga dugay nang wala masettle. — /MEL (BANAT NEWS)