Kagamhanan sa Lapu-Lapu ni-turnover sa multi-purpose buildings

CEBU, Philippines — Gi-turnover sa Lapu-Lapu City Government ang duha ka multi-purpose buildings sa Barangays Canjulao ug Punta Engaño aron madugangan ang mga pasilidad nga magamit alang sa mga serbisyo sa barangay ug mga programa sa komunidad.

Pormal nga gi-turnover ang mga pasilidad kagahapon, Septiyembre 20, 2026 diin si Mayor Ma. Cynthia “Cindi” King-Chan nitambong uban sa mga opisyal sa siyudad ug barangay ang nitambong atol sa mga seremoniya.

Sa Canjulao, gi-turnover sa siyudad ang bag-ong barangay hall ug multi-purpose building diin matod ni Chan nga gisugdan ang proyekto samtang nagsilbi pa siya isip congresswoman sa siyudad. Samtang, ang multi-purpose building sa Punta Engaño gi-rehabilitate kini aron mas magamit sa komunidad.

Ang maong pasilidad gamiton alang sa daycare services, mga kalihokan alang sa senior citizens ug mga operasyon sa barangay.

Gipasalamatan ni Chan ang kooperasyon sa national government sa opisina ni Cebu’s Lone District Representative Junard “Ahong” Chan, sa 17th Sangguniang Panlungsod nga gipangulohan ni Bise Mayor Celsi Sitoy ug sa mga opisyal sa barangay sa pagkakompleto sa mga proyekto.

Si Chan nagkanayon nga gitumong ang mga pasilidad aron mahatagan ang komunidad og mas accessible nga mga lugar diin mahimong mahatag ang serbisyo sa gobiyerno ug ipatuman ang mga programa sa barangay.

Kabahin ang turnover sa padayong paningkamot sa city government nga mapaayo ang mga pasilidad sa mga barangay ug mapaduol ang serbisyo publiko sa mga residente. — /BDB (BANAT NEWS)