GX Park giplanohan sa Probinsiya sa Sugbo nga tukoron

CEBU, Philippines — Nagplano ang kagamhanan sa Probinsiya sa Sugbo sa pagtukod og GX Park, usa ka integrated waste management hub nga nagtumong sa paghiusa sa lain-laing proseso sa pagdumala, pag-recycle ug pag-recover sa basura sa probinsiya.

Si Elizar Sabinay, executive assistant sa Cebu Provincial Planning and Development Office nipresenta sa proyekto atol sa Cebu Provincial Solid Waste Management Board meeting niadtong Miyerklues.

Ang proyekto gitawag og Integrated Waste Management Project in the Cebu Metropolitan Area o GX-PARK Cebu ug giplanong sugdan ang feasibility study sa Septiyembre 11, 2026 uban sa technical funding gikan sa Japanese government.

Matud ni Sabinay nga usa sa dakong hagit sa Cebu karon mao ang paspas nga pagtubo sa populasyon ug urban areas nga nakapabug-at sa kasamtangang infrastructure ug waste management system.

Ang GX Park gituyo nga mahimong integrated resource recovery system diin dili lang paglabay sa basura ang tutokan apan apil ang recycling ug composting.

Gipadayag ni Sabinay nga usa sa tumong sa proyekto ang pag-atubang sa nagkadaghang basura, limitadong recycling ug landfill capacity, kakulang sa segregation sa tinubdan, mahal nga enforcement sa Akta Republika 9003 ug marine ug coastal pollution.

Dili lang waste-to-energy ang gitan-aw sa gobiyerno isip solusyon diin gusto usab niini nga ma-integrate ang recycling, residual ug hazardous waste management sa usa ka lugar.

Ang feasibility study ipatuman sa Japan-based Guun Co., Ltd., uban sa SM Prime Holdings Inc. isip partner company ug uban pa’ng local waste management service providers.

Ang proyekto giplanong ipatuman pinaagi sa public-private partnership uban sa local government units.

Lakip sa teknolohiya nga gitan-aw alang sa proyekto ang fermenting ug drying sa basura, PE/PP pelletizing ug fluff production, pag-compress sa PET bottles, filtering sa used cooking oil ug disassembly ug shredding sa electronic waste.

Target sa proyekto ang municipal waste, commercial waste gikan sa malls, office buildings ug factories, ingon man electronic waste.

Apil usab sa plano ang public awareness programs alang sa waste segregation ug human resource development sa waste management sector lakip ang posibleng pagpadala og personnel sa Japan.

Matud usab ni Sabinay nga nakadawat ang proyekto og technical funding niadtong Hunyo 26, 2026 human sa mga inisiyatibo ug pakigtambayayong sa Japanese government.

Gilaoman nga matapos ang feasibility study sa 2027. Tulo ka posibleng lokasyon ang gikonsidera nga gilangkuban Danao City alang sa North Cebu, Cebu City alang sa Central Cebu ug usa pa ka lugar sa South Cebu nga wala pa mapinal.

Ubos sa proposal, gilaoman nga ang mga LGU nga moapil sa proyekto maghatag og labing menos usa ka ektaryang luna nga duol sa national highway.

Ang proyekto gilaoman usab nga makapamenos sa basura nga moadto sa landfill ug makatabang sa pagkunhod sa wastewater, baho ug greenhouse gas emissions. (BANAT NEWS)