Bantay-sarado ang gf

Dear Dr. Love,

Ako po si Lucky. Magandang araw po. Humihingi po ako ng payo dahil nahihirapan na ako sa sitwasyon namin ng aking girlfriend. Sobrang mahigpit po kasing bantay ng kanyang ina—halos bawat lakad at galaw niya ay sinusubaybayan at kailangang malaman. Minsan ay pinagbabawalan pa siyang lumabas o makipagkita sa akin.

Ayoko po na maging sanhi ng gulo sa kanilang pamilya, pero nakakaramdam na rin po ako ng hirap at pangamba kung paano pa kami lalago kung laging may limitasyon. Nakikita ko ring nahihirapan siya sa pagitan ng kanyang ina at ng aming relasyon. Gusto ko po siyang manatiling kasama, pero hindi ko alam kung paano namin ito haharapin nang tama. Ano po ang dapat kong gawin? Maraming salamat po.

Lucky

Dear Lucky,

Naiintindihan ko ang iyong hirap. Ang pagbabantay ng ina ay kadalasang galing sa takot at labis na pagmamahal—hindi naman niya layong sirain ang inyong samahan. Ang payo ko, huwag mong ituring na kaaway ang ina ng iyong girlfriend. Ipakita mong nirerespeto mo siya at may mabuti kang hangarin para sa kanyang anak. Kapag naramdaman niyang ligtas siya sa iyo, mas madali siyang magtitiwala.

Hayaan mong siya ang maging tulay. Hika-yatin mo ang iyong girlfriend na kausapin nang mahinahon ang kanyang ina—ipaliwanag na kailangan din niyang matuto at magkaroon ng sariling puwang. 

Maging matiyaga ka at maunawain. Huwag mong sumbatan ang iyong girlfriend kung hindi siya makasama. Nasa pinakamahirap siyang kalagayan; ang iyong pag-unawa ang magbibigay sa kanya ng lakas.

DR. LOVE