Chinay nga wanted  nadakpan

CEBU, Philippines — Nadakpan sa mga operatiba sa Criminal Investigation and Detection Group Regional Field Unit 7 (CIDG RFU7) ang usa ka babaye nga giilang usa sa Regional Most Wanted Persons sa Central Visayas atol sa operasyon sa OPLAN “Pagtugis” sa Barangay Banawa, Cebu City, pasado alas 5:45 sa hapon niadtong Mayo 15, 2026.

Ang nadakpan giila nga si Michelle Go Chu alyas Michelle Lim Go Chu, 44 anyos, Filipino-Chinese, minyo, lumad sa Ormoc City apan temporaryong nagpuyo sa White Hills Subdivision, Barangay Guadalupe, Cebu City.

Gipangulohan sa CIDG Cebu City Field Unit ang operasyon uban sa suporta sa Maragondon Municipal Police Station sa Cavite, ug Police Station 9 sa Cebu City Police Office.

Base sa CIDG, gidakop ang suspetsado pinaagi sa walong warrant of arrest nga may kalabutan sa kasong estafa, swindling ug perjury nga gipagawas sa nagkadaiyang Regional Trial Courts sa Toledo City, Cebu City ug Mandaue City.

Kadaghanan sa mga kaso adunay rekomendasyon nga “no bail,” ilabina sa mga kasong estafa ug swindling ubos sa Presidential Decree 1689 o ang Anti-Syndicated Estafa Law.

Matud sa kapulisan, dugay nang gipangita sa mga awtoridad ang maong babaye tungod sa nagkadaghang reklamong estafa nga giatubang niini.

Human sa pagdakop gidala dayon gidala siya sa opisina sa CIDG Cebu City Field Unit alang sa booking ug dokumentasyon sa dili pa siya iturn-over ngadto sa mga korte nga nagpagawas sa mga warrant of arrest. (BANAT NEWS)