Shabu, armas sakmit atol sa operasyon sa PRO-7

CEBU, Philippines — Kapin sa P2.5 milyones nga kantidad sa ilegal nga drugas ang nasakmit atol sa anti-illegal drug operations sa Central Visayas ug 10 ka armas usab ang nasakmit gikan Mayo 15 hangtud sa 16, 2026.

Matud sa Police Regional Office-7 nga nakapahigayon sila og 52 ka anti-illegal drug operations ug 59 ka drug suspects ang nasikop lakip ang duha ka high value individuals ug pipila ka bag-ong natumbok nga drug personalities.

Nakompiska sa kapolisan ang kinatibuk-an nga 376.24 gramong shabu nga adunay gibana-banang kantidad nga P2,558,437.

Ang pinakadako nga drug haul natala mga alas 8:30 sa gabii niadtong Biyernes diha sa Visitacion Street, Barangay Sambag II, Cebu City diin ang mga operatiba sa Police Station 2 nagpahigayon og buy-bust operation diin nasikop nila si alyas nga “Kirvs.”

Nakompiska sa kapolisan gikan sa suspetsdo ang mga 240 gramo nga shabu nga nagkantidad og P1.632 milyones.

Sa laing operasyon sa CCPO sa maong adlaw diha sa Sitio Buwaran, Barangay Sawang Calero diin nasikop ang usa ka HVI ug nasakmitan kini og 50.24 gramo nga shabu nga nagkantidad og P341,632.

Sa Lungsod sa Cordova, usa ka langyaw ang nadakpan sa joint operation sa Philippine Drug Enforcement Agency-7 ug Cordova Police Station atol sa pagpatuman sa search warrant sa Alergia Palms Uno, Barangay Gabi sa maong lungsod niadtong Sabado sa buntag.

Samtang sa kampaniya batok sa loose firearms ang niresulta sa pag-aresto sa pito ka indibidwal diin 10 ka armas ug usa ka explosive device ang nasakmit atol sa lain-laing operasyon. — /BDB (BANAT NEWS)