Krisis sa edukasyon may kalabutan sa malnutrisyon

CEBU, Philippines — Gipadayag sa National Nutrition Council (NNC) ang lig-on nga suporta niini sa findings sa Second Congressional Commission on Education (EDCOM 2), nga nagpakita nga ang nagkagrabeng krisis sa edukasyon sa nasud adunay dakong kalambigitan sa malnutrisyon sa kabataan ilabi na sulod sa unang 1,000 ka adlaw sa kinabuhi.

Sa ilang tubag sa final report sa EDCOM 2 sa 2025 nga giulohan og “Turning Point: A Decade of Necessary Reforms,” gipadayag sa NNC nga ang dili maayong nutrisyon sa pagkabata ug sa unang yugto sa kinabuhi makadaot og permanente sa paglambo sa utok, kahanas sa panghunahuna, ug sa pagkat-on, nga moepekto sa tibuok edukasyon ug kinabuhi sa bata.

Gikutlo sa Konseho ang mga pagtuon nga nagpakita nga ang dugay nga malnutrisyon, ilabi na ang stunting kun wa pagtubo, makahatag og permanente nga pisikal ug kognitibong kadaut.

Sumala sa NNC, ang learning crisis nga giatubang karon sa mga estudyante nga Pilipino resulta sa pila ka dekada nga kakulang sa husto nga nutrisyon ug pag-atiman sa pinakaimportante nga yugto sa pagtubo sa tawo. Isip nag-unang policymaking ug coordinating body sa nutrisyon sa nasud, gipasig-uli sa NNC ang ilang pasalig sa pagpahugot sa mga programa nga nakatutok sa First 1,000 Days of Life, nga ilang giila isip epektibo ug cost-effective nga estratehiya batok sa malnutrisyon ug dili maayong learning outcomes.

Niadtong 2017, pinaagi sa Early Childhood Care and Development in the First 1,000 Days Program, gipatuman sa NNC ang integrated interventions nga naglakip sa health, nutrition, early education, ug social services.

Niadtong 2019, gi-report sa Konseho nga 57 sa 59 ka mga munisipalidad ug 11 sa 12 ka probinsya nakadawat og total nga P121 milyon para sa mga nutrition-focused initiatives sama sa food gardens, nutrition education, growth monitoring, ug community mobilization.

Gipasigarbo usab sa NNC ang ilang Tutok Kainan Dietary Supplementation Program, nga naghatag og nutrient-dense nga pagkaon para sa mga mabdos nga delikado sa kakulang sa nutrisyon ug mga batang 6 hangtod 23 ka bulan nga kulang sa nutrisyon.

Ang NNC adunay tinuig nga budget nga P311 milyon ug nag-atubang og institutional limitations, lakip na ang kakulang sa workforce ug leadership constraints. Bisan pa niini, gipadayag sa ahensya nga nakasugod na sila og mga reporma nga uyon sa rekomendasyon sa EDCOM 2.

Giawhag sa Konseho ang national government, LGUs, development partners, private sector, ug academic institutions nga ipahiangay ang ilang mga programa sa PPAN 2023–2028 aron mapaspas ang pag-uswag sa nutrisyon, pagkat-on, ug development outcomes sa mga batang Pilipino. — /MEL (BANAT NEWS)