Kapitolyo nangandam sa Governor’s Run 2026

CEBU, Philippines — Gipangandaman karon sa Probinsiya sa Sugbo ang unang “Governor’s Run 2026”, usa ka dakong charity run diin tumong niini nga makatigom og pundo alang sa feeding program ngadto sa mga kabus nga batang Sugboanon.

Ang maong kalihokan dumalaon sa gibanhaw nga Cebu Provincial Sports Commission (CPSC) ug gilaoman nga makatapok og liboan ka runners gikan sa nagkalain-laing dapit sa probinsiya.

Matud ni Rodrigo Tanza, Jr., executive director sa CPSC nga hapit na mahuman ang koordinasyon sa mga organizers alang sa opisyal nga pagsugod sa promosyon ug registration.

Giplano nga ipahigayon ang maong kalihokan atol sa founding anniversary celebration sa Probinsiya sa Sugbo karong buwan sa Agosto.

Gilaoman usab sa Kapitolyo nga makadani kini dili lang sa ordinaryong runners apan api ang celebrities, elite runners ug mga representante gikan sa nagkalain-laing local government units.

Tumong sa probinsiya nga makaabot og labing menos 3,500 ka partisipante ang unang Governor’s Run apan posible pa nga mosobra sa maong gidaghanon ang motambong.

Ang sugod ug tumoy sa lumba himuon sa Capitol grounds niining siyudad.

Giandam usab sa organizers ang nagkalain-laing kategoriya sa dagan aron ma-accommodate ang mga partisipante nga adunay lain-laing edad ug lebel sa physical fitness.

Lakip sa mga kategoriya nga giplano mao ang 21-kilometer, 12-kilometer, 10-kilometer, 5-kilometer, 3-kilometer ug 1-kilometer categories.

Gawas sa pagpalambo sa sports ug physical fitness, gigamit usab sa probinsya ang maong kalihokan aron mapalambo ang turismo sa lain-laing lungsod ug Siyudad sa Sugbo.

Matud ni Tanza nga magbutang sila og mga tarpaulin sa matag water station nga magpakita sa mga tourist attractions ug lokal nga delicacies sa matag lungsod.

Gilaoman usab nga moapil sa dagan si Governor Pamela Baricuatro ilabina sa mubo nga category.

Ang Governor’s Run usa sa unang dagkong programa nga gilinya human sa pagbanhaw pag-usab sa Cebu Provincial Sports Commission nga pila na ka tuig nga walay operasyon.

Sa niaging mga bulan, nigahin og P50 milyones ang Kapitolyo alang sa mga programa sa komisyon nga nagtumong sa grassroots sports development, athlete support ug youth engagement sa tibuok probinsiya.

Gawas sa Governor’s Run, nangandam usab ang Kapitolyo alang sa pagbalik sa Governor’s Cup basketball tournament nga giplanong sugdan karong Septiyembre isip kabahin sa subling pagpalig-on sa sports development program sa probinsiya. BDB BANAT NEWS