Visayas grid gipaubos sa red ug yellow alert status

CEBU, Philippines — Gibutang sa red ug yellow alert status ang Visayas Grid sa National Grid Corporation of the Philippines (NGCP) gumikan sa taas nga demand sa supply sa koryente ug sa mga outages sa pipila ka planta.

Kini maoy hinungdan sa rotational brownout nga nasinate sa Sugbo.

Ubos sa advisory, ang red alert gideklarar gikan sa alas 3:00 sa hapon ngadto sa alas 8:00 sa gabii samtang ang yellow alert gikan sa alas 8:00 sa gabii ngadto sa alas 9:00 sa gabii. Suma sa NGCP ang available capacity sa Visayas Grid miabot sa 2,510 megawatts samtang ang peak demand niabot og 2,413 megawatts.

Ang ahensya miingon nga dunay 12 ka power plants ang nipaubos sa forced outage sukad Marso 2026, upat sa 2025, duha sa 2024, duha sa 2023, ug usa ka planta ang wa na magamit sukad tuig 2021.

Laing 15 ka planta ang nag operate nga gipagamyan ang kapasidad nga miresulta sa 862.3 megawatts nga kulang sa grid.

Apil sa rason sa pag-isyu og alert mao ang forced outages sa Therma Visayas Inc. Unit 1 ug Unit 2, nga ang matag usa dunay kapasidad nga 169 megawatts, ug Panay Energy Development Corporation Unit 3 nga dunay kapasidad nga 150 megawatts.

Aron mamintinar ang integridad sa power system, suma sa NGCP nga posible silang mopatuman sa Manual Load Dropping gikan sa alas 4:00 sa hapon hangtud sa alas 8:00 sa gabii sa pipila ka lugar sa Visayas.

Ang mga area nga posibleng maapektuhan mao ang Visayan Electric Company, Mactan Electric Company, Cebu I Electric Cooperative Inc., Cebu II Electric Cooperative Inc., Cebu III Electric Cooperative Inc., sa Cebu.

Ang Visayan Electric (VECO) nipahibawo na sa one-hour rotational brownouts sa pipila ka parte sa Cebu City, Mandaue City ingon man sa Naga City, ug San Fernando. Gikan sa The Freeman/MEL BANAT NEWS