Priority target sa drugas, nadakpan

CEBU, Philippines — Usa ka Regional Priority Target sa Cebu Police Provincial Office (CPPO) ang nadakpan sa joint buy-bust operation nga gihimo sa mga operatiba sa Barangay Bulacao, Talisay City sa gabii sa Lunes, Mayo 11, 2026. Ang nasikop giila nga si Julius Bacus Daan, alyas “Juls,” 45, Job Order employee sa Talisay City LGU ug residente sa Sitio Hawod, Barangay Bulacao, Talisay City.

Gipahigayon sa Police Intelligence Unit ug Provincial Drug Enforcement Unit sa CPPO, kauban ang Talisay City Police Station, ang operasyon alas 6:34 sa gabii sa Sta. Lucia Road, Barangay Bulacao.

Nakuha gikan sa suspetsado ang kapin 50 gramos sa gituohang shabu nga adunay standard drug price nga P340,000.

Sumala sa kapulisan, usa ka semana nga monitoring ang gihimo batok kang Daan kinsa giingong aktibong nagapadagan sa ilegal nga droga sa Talisay City ug mga kasikbit nga lungsod.

Sa intelligence report,giingong  ang suspetsado nga  makabaligya og  100 gramos sa shabu matag semana depende sa demand.

Gibutyag usab sa mga awtoridad nga ang giingong source sa ilegal nga droga sa suspetsado mao si Jonathan Mendo, usa ka ex-convict ug iladong drug personality sa Talisay City. Ang suspetsado karon gitanggong sa Talisay City Police Station samtang giandam ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002. – EIM BANAT NEWS