Managsuon na buy-bust
CEBU, Philippines — Tulo ka tawo lakip ang usa ka tigulang nga babaye ingon man usa ka Child in Conflict with the Law (CICL) ang nasikop sa sunod-sunod nga anti-illegal drug operations sa Cebu City Police Office (CCPO) sa Barangay Quiot, Labangon, ug Sambag 2 niadtong Mayo 8 hangtod 9, 2026.
Gihimo ang operasyon isip kabahin sa gipakusog nga kampanya batok sa ilegal nga drogas ug pagpahugot sa seguridad sa siyudad may kalabotan sa ASEAN Summit 2026.
Sa unang operasyon nga gipangulohan sa Police Station 10 ubos ni Police Captain Joel Dela Cerna, tulo ka hamtong ug usa ka CICL ang nadakpan alas 1:30 hangtod alas 2:50 sa kadlawon sa sitio UBCA 1, 2 ug 3 sa Barangay Quiot ug sa A. Lopez Street sa Barangay Labangon.
Nasakmit sa kapolisan ang pipila ka sachet sa gidudahang shabu nga nakita sa lugar sa operasyon.
Ang tulo ka hamtong nga suspek gidala sa Police Station 10 ug mag-atubang og kaso nga paglapas sa Section 11, Article II sa Republic Act 9165 o Comprehensive Dangerous Drugs Act of 2002.
Ang CICL giturn-over sa Women and Children Protection Desk (WCPD) alang sa hustong pag-atiman ug proseso subay sa balaod.
Sa laing bahin, ang Police Station 2 sa pagpanguna ni Police Major Aris B. Tormo, kaabag ang Philippine Drug Enforcement Agency (PDEA), nakadakop sa laing suspek sa buy-bust operation sa sitio Lower Kawayan, Barangay Sambag 2, alas 8:10 sa gabii niadtong Mayo 8, 2026. Nasakmit gikan sa suspek ang mga lima ka gramo sa gidudahang shabu nga nagkantidad og P34,000.
Samtang duha ka managsuon ang nadakpan sa buy-bust operation nga gihimo sa Philippine Drug Enforcement Agency (PDEA) RO7 ug Mandaue City Police Station 2 sa sitio Homeowners, Barangay Tipolo, Mandaue City kagahapon, Mayo 9.
Ang mga suspek giila nga sila si Fermin Bilagantol Leyson, 29, ug Billy Bilagantol Leyson, 34, nga pulos residente sa maong dapit. Nasakmit sa mga otoridad ang 60 gramos sa gituhuang shabu nga mibalor og P408,000 ug mga kagamitan sa ginadiling drugas. (CEBU NEWS)
- Latest
