Armas ug drugas nasakmit gikan sa priority target

CEBU, Philippines — Nadakpan sa operasyon sa kapulisan ang usa ka Regional Priority Target sa kampanya batok illegal nga drugas atol sa buy-bust operation nga gihimo sa Provincial Intelligence Unit / Provincial Drug Enforcement Unit (PIU/PDEU) sa Cebu Police Provincial Office (CPPO) alas 10:23 sa gabii, Abril 29, 2026, sa Barangay Laray sa Talisay City.

Ang nadakpan giila nga si Ariel Abapo Numeran, alyas “Bakang" 44. Si Numeran nadakpan na kaniadtong 2018 tungod gihapon sa illegal nga drugas  ug bag-o lang nakagawas niadtong Mayo 2025.

Human sa usa ka semanang surveillance nasuta nga abot sa operasyon sa suspek ang mga lugar sa Talisay City ug Minglanilla.

Narekober gikan sa suspek ang 100 gramos sa gituohang shabu nga nagkantidad og P680,000, ingon man usa ka .357 revolver nga adunay tulo ka bala.

Ang suspek nag-atubang og kasong paglapas sa Comprehensive Dangerous Drugs Act of 2002 ug illegal possession of firearm. (BANAT NEWS)