Gidul-it pagpusil, anak napagan
CEBU, Philippines — Patay ang 50-anyos nga amahan, samtang samdan ang iyang 14-anyos nga anak nga babaye human sila gipamusil sa wa mailhing gunman sulod sa internetan sa Barangay Jaclupan, dakbayan sa Talisay niadtong Biyernes sa hapon, Abril 24.
Ang namatay mao si Ritchard Silva De Lima, usa ka mangayagay og balas sa sapa, samtang samdan usab ang iyang menor de edad nga anak nga babaye, kansang pagkatawo gitago sa Banat News.
Ang duha pulos residente sa Purok Kawayan, Sitio Tabok Sapa sa nahisgutang barangay.
Base sa inisyal nga imbestigasyon sa Talisay City Police Station, nahitabo ang pagpamusil mga alas-5 sa hapon niadtong adlawa samtang naglingkod ug nagduwa si De Lima sulod sa internetan uban sa iyang anak nga babaye nga nagbarog tupad niya.
Pipila ka gutlo lamang, kalit nga misulod ang usa ka lalaki ug walay duha-duhang giduol si De Lima ug gipusil dayon kini sa makausa nga higayon.
Naigo sa ulo ang biktima apan nalahus ang bala sa wala nga paa sa anak niini. Daling misibat ang mamumuno.
Daling miresponde ang mga otoridad sa dapit ug mihimo og hot pursuit operation.
Matud pa ni Police Staff Sergeant Moreto Sagario Jr., imbestigador sa Talisay City Police Station nga nahinabi sa Banat News, aduna nay person of interest nga maoy gitumbok sa maong insidente sa pagpamusil.
Dugang ni Sagario nga nailhan ang nagpusil sa biktima pinaagi sa closed-circuit television (CCTV) footage sa lugar atol sa backtracking operations nga gihimo sa kapulisan.
Nakita sa CCTV ang mamumuno nga niikyas sakay sa motorsiklo nga siya ra pud ang gamaneho.
“Niingon man gud iyang asawa nga ang iyang bana nga nag dispose-dispose og illegal drugs. Possible (na drug-related) kay wala siyay laing kontra man kay mao ra nay giingon] sa iyang asawa,” matud pang Sagario. (BANAT NEWS)
- Latest
