Osmeña nimando sa pagsuspenso sa budget hearing

CEBU, Philippines — Mainiton ang nahitabong hearing sa Supplemental Budget (SB) 1 nga gipangulohan sa Committee on Budget and Finance niadtong Abril 16, 2026 gumikan kay nisulod si Bise Mayor Tomas Osmeña sa session diin buot niining ipasuspenso ang budget hearing gumikan kay adunay mga kuwang nga mga detalye nga angayan nga klarohon una magpahigayon og deliberasyon.

Ang maong budget nikabat kini ngadto sa P981.9 milyones ug gitumong sa pagpundo sa mga programa ug gasto nga wala maapil sa giaprobahan nga 2026 annual budget.

Nagduda si Osmeña sa maong gisugyot nga kantidad gumikan kay daghang items nga nagpakita lang og dugang nga kantidad apan walay klarong pasabot kong unsa kini, asa gikan, ug nganong mas nagkinahanglan og dugang kantidad.

Nipasidaan si Osmeña nga posibleng maaprobahan ang pipila ka items nga walay hingpit nga pagsabot kong dili klaro ang breakdown sa budget.

Matud ni Osmeña nga adunay sayop sa paagi sa pag-andam sa budget diin kinahanglan nga matag item hatagan og katin-awan aron walay kwarta nga mausik.

Samtang nagpadayon ang diskusyon, nitingog usab si Konsehal David “Dave” Tumulak, tsirman sa Committee on Budget and Finance ug matud niini nga ubos sa Local Government Code of 1991 ang mayor lang ang adunay katungod sa pag-andam sa executive budget bisan og annual budget o supplemental budget man kini.

Ang proposal gikan sa Cebu City Development Council ug gipaubos og pagsusi sa Local Finance Committee sa dili pa isumite sa konseho.

Matud ni Tumulak nga limitado lang ang papel sa Committee on Budget and Finance sa pagpahigayon og hearing, pagpaminaw sa mga resource persons, ug paghatag og rekomendasyon.

Giklaro usab ni Tumulak ang pasangil ni Osmeña nga siya ang nag-andam sa budget.

Si Tumulak nagkanayon nga gitawag ang hearing pinaagi sa opisyal nga resolusyon ug kabahin kini sa pormal nga legislative nga proseso bisan og wala ang bise mayor sa dihang giaprobahan kini.

Tumong ni Osmeña nga ipasuspeso una ang budget hearing aron makahatag og dugang panahon sa mga konsehal sa pagsusi sa proposal.

  Sa habig, ni Konsehal Alvin Arcilla nisugyot kini sa pag-terminate sa maong budget hearning gumikan kay adunay kadudahan nga P400 milyones nga gilista isip source of funds.

Matud ni Arcilla nga ang maong kantidad posibleng nagrepresentar sa mga utang sa siyudad sa mga contractor ug supplier nga kinahanglang bayaran.

Nangayo usab og detalyadong listahan ang konsehal sa mga transaksiyon aron masuta kong ang maong pundo angay ba nga gamiton alang sa bag-ong gasto.

Bisan pa sa mga kabalaka nipadayon ang budget hearing human nisugot si Osmeña uban sa pasalig sa mga konsehal nga tanang isyu tukion pa sa mas lawom nga deliberasyon sa dili pa ang mohatag og hokum kong aprobahan ba ang kinatibuk-ang kantidad sa SB1. BDB BANAT NEWS