5.1 magnitude nga linog sa Bogo

CEBU, Philippines — Gitay-og na usab og 5.1 magnitude nga linog ang Dakbayan sa Bogo nga nabatygana sa tibuok isla sa Sugbu ug mga silingang probinsiya kagahapon sa hapon hinuon ug walay natalang dakong kadaut sa hitabo.

Apan bisan sa kahinay niini, nakatay-og kini sa mga buildings ug estraktura sa Sugbu ug nakamugna og kahadlok sa mga tawo epekto sa kahadlok nga namugna sa miaging 6.9 magnitude nga linog niadtong Septembre 30,2025 nga nakaguba og daghang estraktura ug nikalas og mga kinabuhi ilabi na sa Dakbayan sa Bogo.

Sumala pa ni Engr. Robinson Jorgio, Science Research Specialist ug Officer-in-Charge sa DOST–PHIVOLCS Visayas Cluster Monitoring Center for Earthquake and Tsunami (PVCMCET), ang linog unang na-record nga magnitude 5.4 apan gi-revise ngadto sa 5.1 human sa dugang nga analysis.

Mabaw ra matud pa ang maong linog nga may gilawmong 10 hangtod 11 ka kilometro, maong nabatyagan gyud ni sa tanan.

“Kung magnitude 5 paubos, kasagaran wala gyud na damage sa mga building. Basin naay mahulog nga butang, pero dili siya makaguba og estraktura,” matud niya.

Naa say 10 ka aftershocks sab ang natala sa PHIVOLCS ug padayung gi-monitor ang sitwasyon.

Nahitabo ni alas 3:22 p.m., nga ang epicenter nga unang nahimutang 17 kilometros southeast sa Bogo City sa gilawmon nga 10 kilometros ug gi-classify nga tectonic in origin.

Sa ulahing update, gi-downgrade sa PHIVOLCS ang magnitude ngadto sa 5.1, ug 11 kilometros ang gilawmon ug gi-adjust ngadto sa 12 kilometros southeast sa Bogo City.

Ang pinakakusog nga pagtay-og nabatyagan diha sa Bogo City ug Medellin, Cebu.  Intensity IV narecord sa San Francisco, Cebu, ug sa Hilongos ug Villaba sa Leyte.

Intensity III sa Liloan, Talisay City, Cebu City, ug Lapu-Lapu City, ingon man sa mga bahin sa Leyte sama sa Ormoc City, Baybay City, Carigara, Isabel, ug Abuyog. Nabati usab ang linog sa Esperanza, Masbate, ug Hinundayan sa Southern Leyte.

Ang kagamhanan sa Dakbayan sa Bogo ang mga residente nga kontrolado ang sitwasyon, walay dakong kadaot sa imprastruktura apan dunay pipila ka minor injuries sa mga residente.

Base sa initial assessment, gi-confirm sa mga awtoridad nga walay structural damage nga na-record sa tibuok siyudad.

Dunay pipila ka residente ang nakaangkon og minor injuries nga dali nang gi-atiman sa City Disaster Risk Reduction and Management Office (CDRRMO) ug sa emergency responders.

Ang City Public Information Officer nga si Jeany Eve Ynot miingon nga dali nga nakig-coordinate sa mga residente ang mayor aron tubagon ang ilang mga kabalaka.

Nakita sab nga gipagawas sa hospital staff sa Provincial Hospital sa Bogo ang mga pasyente.

“Some residents sustained scratches after tripping while running, one stepped on a sharp object after going out without footwear, and three person fainted due to panic and were immediately attended by the DRRMO,” matud niya.

“At this time, we call on everyone to remain calm, vigilant, and discerning. We want to reassure all Bogohanons that your local government is fully alert, responsive, and committed to ensuring the safety and well-being of our communities,” awhag ni Mayor Marie Cielo Martinez.

Samtang gipasalig sab sa National Grid Corporation of the Philippines (NGCP) nga stable ang power transmission services sa Cebu human sa linog.

Ang mga estudyante ug staff sa pipila ka institusyon, lakip ang University of San Carlos Downtown Campus ug Cebu Technological University (CTU) Main Campus, dali sab naghimo og evacuation.

Sa Metro Cebu, ang mga tawo nga nagtrabaho sa opisina, lakip ang Cebu IT Park, migawas usab sa building isip safety precaution. (BANAT NEWS)