Operasyon sa Mayor of the Night gisugdan na

CEBU, Philippines —  Gisugdan na ang operasyon sa Mayor of the Night, usa ka 24/7 government services hub nga gitukod aron matubag ang panginahanglan sa mga night-shift workers, BPO ug IT personnel, ug tanang Cebuano nga nanginahanglan og serbisyo.

Ang operasyon gibuksan kagahapon, Marso 28 uban sa liderato ni Cebu City Mayor Nestor Archival, Vice Mayor Tommy Osmeña, ug uban pang lokal nga opisyal.

Ang hub nahimutang sa Cebu Exchange Tower, Barangay Lahug, duol sa Cebu IT Park, ug gituyo isip usa ka one-stop center alang sa mga transaksyon sa government agencies sama sa Social Security System, PhilHealth, Bureau of Internal Revenue, Land Transportation Office, ug uban pa.  Sa ceremonial launching, giingon ni Archival nga ang serbisyo nagpasiugda sa prinsipyo nga ang gobyerno motrabaho kung kanus-a kinahanglan sa mga tawo, dili lang sa regular office hours. Giingon usab niya nga ang hub dili lamang para sa night-shift BPO o IT workers, apan alang sa tanang Cebuano nga nanginahanglan og serbisyo sa bisan unsang oras.

Gisuportahan ang operasyon sa daghang national government agencies ug sa lokal nga konseho, nga mi-aproba og multi-year lease aron maseguro ang padayon nga operasyon sa hub. Ang inisyatibo usa ka lakang aron ang Cebu City mahimong responsive, inclusive, ug magtrabaho 24/7 para sa katawhan.

Ang Mayor of the Night usa ka bahin sa Cebu City 24/7 Government Services Program, gilatid sa Executive Order No. 27, series of 2025 ni Mayor Archival.

Tumong niini ang paghatag og round-the-clock access sa serbisyo sa lokal ug national government agencies aron mas maserbisyohan ang night-shift workforce ug uban pang residente. Ang Cebu City nailhan isip usa sa mga major BPO hubs sa Pilipinas, busa dako ang panginahanglan sa serbisyo nga mo-match sa oras sa trabaho sa mga night-shift workers. Ang Mayor of the Night usa sa mga unang programa sa Pilipinas nga naghatag og tibuok-adlaw nga serbisyo sa lokal nga gobyerno aron matubag ang nagkadaiya nga panginahanglan sa katawhan ug workforce sa siyudad. (CEBU NEWS)