Drayber sa traysikol gipugakhang patay
CEBU, Philippines — Patay ang usa ka drayber sa traysikol human kini gipugakhang diha sa Magay St., San Jose Village, Barangay Lawaan 3, Dakbayan sa Talisay niadtong Martes sa hapon.
Ang biktima mao si alyas “Boyjie”, 38-anyos, drayber sa traysikol, taga Purok Nangka, Sitio Cadicay sa nahisgutang barangay.
Ang kapolisan sa Talisay nakadawat og tawag kalabot sa insidente sa pagpamusil diha sa lugar.
Naabtan sa mga nirespondeng polis ang biktima nga nagbuy-od diha sa yuta nga adunay samad pinusilan dapit sa gusok niini.
Si Lester Bacalso, presidente sa mga drayber sa traysikol diha sa lugar nagkanayon nga ang biktima bag-o lang kini nga nag-drive og traysikol.
Ang biktima kinsa lumad nga taga probinsiya sa Negros ang taud-taod na nga nagpuyo diha sa lugar.
Gibutyag ni Bacalso nga ang biktima kanunay’ng nalambigit og kagubot sa iyang pamilya diin ang iyang inahan ang gibunalan og bato ug nakaengkwentro usab kini sa iyang mga igsuon.
Gikataho nga ang biktima tiggamitan kini og ilegal nga drugas.
Base sa footage sa closed circuit television (CCTV) camera diha sa lugar nailhan ang usa sa mga kriminal kinsa giingong paryente ra usab sa biktima.
Ang maong suspetsado nasikop kinig ug gikatadakdang pasakaan og kasong murder lakip ang mga kauban niini kinsa padayong pang gipangita. (BANAT NEWS)
- Latest
