CCPO, CCTO andam na sa Semana Santa

CEBU, Philippines — Subay sa nagkaduol nga pag-obserba sa Semana Santa, ang mga hepe sa nagkadaiyang police stations ug hepe sa special units sa Cebu City Police Office gimandoan na sa ilahang deployment sa maong kalihokan.

Tutokan sa ilahang deployment ang pantalan, terminal, simbahan ug ubang mga lugar nga dugokan og daghang tawo panahon sa Semana Santa.

Gikataho nga kapin sa 600 ka police personnel sa CCPO ang ipakatap diha sa mga nagkalain-laing dapit.

Mag-establisar usab ang CCPO og Police Assistance Desks (PADs) ilabi na sa terminals, malls, simbahan ug areas of convergence ug moabag usab sa kapolisan ang force multipliers.

Nakaplastada na ang tanang security preparation sa CCPO ug gipaabot nalang kon kanos-a pormal nga i-deploy ang PADs sa mga nahisgutang mga lugar.

Nipahimangno ang CCPO sa mga manguli sa mga probinsiya nga ipanugon sa silingan ang balay, siguradohon usab nga sirado kini aron dili mabiktima sa mga kawatan.

Subay niini, gibutyag sa Cebu City Transportation Office (CCTO) nga usa sa ilang gitutokan sa operasyon karong Semana Santa mao ang Carbon Public Market nga kasagaran maghuot nianang panahona.

Si Raquel Arce, pangulo sa CCTO nagkanayon nga naandan na matag tuig nga daghang mga mamaligyaay ang magpunsisok aron mamalit og mga sangkap alang sa benignit.

Matud ni Arce nga ang CCTO makig-alayon usab sa Office of the City Market aron mas mahan-ay ang pag plastada sa mga mamaligyaay nga nanginabuhi sa Carbon.

Gibutyag ni Arce nga ang CCTO mopahugot usab sila sa ilang operasyon diha sa mga terminal  sugod sa Miyerkules Santo, Abril 1, 2026 diin gilaoman ang pagdagsa sa mga pasahero nga mamalik sa probinsiya o mobakasyon.

Si Arce nagpasalamat kang Cebu Archbishop Alberto Uy kinsa nisuporta sa hangyo sa CCTO nga ang tanang simbahan sa siyudad mosumiter og schedule sa mga kalihokan nila ilabi na kon kini ipahigayon diha sa kadalanan sama sa mga prosisyon.

Nunot niini, ang kalihokan sa semana gibuksan na pinaagi sa chrism mass ug renewal of priestly vows nga gitambongan sa gatusan ka kaparian sa Archdiocese of Cebu kagahapon sa buntag nga gipangulohan ni Uy uban kang Archbishop Emeritus Jose Palma, D.D.

Ang Santos nga misa gipahigayon alas 9:00 sa buntag diin gipahigayon ang chrism mass ug renewal of priestly vows nga buhaton unta matag Huwebes Santo sa buntag apan tungod sa kadako sa Archdiocese of Cebu gipahigayon na kini kagahapon. Nicholas Jon Malaga ug Rowena D. Capistrano, BDB BANAT NEWS