Duha ka PDLs angol sa hostage-taking sa prisohan sa Lapu-Lapu City
CEBU, Philippines — Duha ka person deprived of liberty (PDLs) ang naangol human gi-hostage sa pito ka kaubang mga piniriso nga gikatahong nakaikyas gikan sa isolation area sulod sa Lapu-Lapu City Jail - Male Dormitory niadtong Biyernes sa hapon, Marso 13. Matud sa Bureau of Jail Management and Penology 7 (BJMP-7), nakaangkon og minor injuries ang duha ka PDL atol sa nahitabong hostage taking incident mga alas 12:15 sa udto.
Gikatahong niadtong tungora, pito ka mga PDL ang nakaikyas gikan sa confinement sa isolation area ug mipaingon dayon sa Solid 1 Building sa jail facility diin ilang gi-hostage ang ilang mga kaubang piniriso. Base sa inisyal nga imbestigasyon, nasuko ang mga hostage-takers sa bag-ong gidestino nga PDL Commander sulod sa dormitoryo.
Atol sa insidente, paspas nga gi-activate sa mga jail personnel ang ilang security protocols, samtang ang BJMP sa dakbayan sa Lapu-Lapu nipakatap usab sa ilang Regional Special Tactics and Response Team aron motabang sa pagdumala sa sitwasyon ug mas masiguro ang kaluwasan sa tanang tawo sulod sa jail facility. Lakip sa gipakatap mao ang mga personnel sa Mobile Patrol Unit, City Mobile Force Company, City Intelligence Unit, ingon man ang Special Weapons and Tactics (SWAT) teams gikan sa Lapu-Lapu City ug Mandaue City nga nagbantay sa gawas sa maong prisohan.
Paglabay sa lima ka oras, mga alas 5:17 sa hapon, boluntaryong mitahan ang pito. Sa pagkakaron, gibulag na sila sa Dorm 1 sa bag-ong building alang sa tukmang kustodiya ug imbestigasyon. Ang duha ka samdan giatiman sa mga medical personnel sa prisohan.
“Ok na po yung PDL na nanggugulo kahapon naka isolate na po, safe and secured, back to normal situation na po tayo,” matud pa ni Lapu-Lapu City BJMP Male Dormitory Warden, Jail Superintendent Richard Tulabing sa mensahe nga gipadala niya sa Banat News. Wala niya gibutyag unsay rason nganong dili nila gusto ang bag-ong PDL commander.
Ang BJMP-7 mipasalig sa publiko nga magpadayon ang kahapsay ug kaluwasan sulod sa pasilidad. (BANAT NEWS)
- Latest
