CERA nanawagan og water security

CEBU, Philippines — Nanawagan ang Cebu Electricity Rights Advocates (CERA) sa Metropolitan Cebu Water District (MCWD) nga palig-onon ang water security ug masulbad ang problema sa water losses, nga ilang gitawag og “fiscal and humanitarian disaster” alang sa katawhan sa Sugbo.

Suma pa ni CERA convenor Nathaniel Chua, nga bisan pa sa bag-ohay nga pagsaka sa water rates, padayon gihapon nga nawad-an ang MCWD og gibana-banang 30%  hangtod  32% sa ilang total water supply tungod sa leaks, theft ug metering errors, mas taas kaysa 20% ceiling nga gimando sa Local Water Utilities Administration (LWUA).

“MCWD is straining the household budget to fund a system that is literally bleeding consumer dry. Why should the public pay for ‘ghost water’ that never reaches faucets?” matud pa ni Chua.

Gipasabot sa CERA nga ang pinansyal nga epekto sa maong Non-Revenue Water (NRW) moabot og ginatos ka milyones ka piso matag tuig nga nawad-an og kita, kwarta nga unta magamit sa pag-ayo sa nagkadaut nga distribution network o sa pagtabang sa lifeline consumers.

Gipadayag usab ni Chua ang delikadong koneksyon tali sa teknikal nga kakulang sa MCWD ug sa nagpadayon nga problema sa basura.

Matud niya, kon mawad-an og kuryente ang pumping stations sa MCWD ilabina panahon sa “Yellow Alerts” moubos ang water pressure sa mga tubo.

Kini makahatag og vacuum effect samtang mipasidaan siya nga ang mga “temporary” nga dump sites walay industrial-grade liners.

Sa bahin sa South Road Properties (SRP), giingon ni Chua nga kini usa ka major corridor sa water distribution, ug ang pagbutang og dagkong tapok sa wala ma-manage nga basura duol sa mga linya nagdugang sa risgo sa “cross-contamination” panahon sa system fluctuations.

Nanawagan ang CERA og dayong “Operational Synergy,” lakip ang paghunong sa paggamit sa Pond A isip dump site ug pagbalhin sa “Bagsakan” operations ngadto sa pasilidad nga adunay hustong wastewater treatment.

Gidugang ni Chua nga ang MCWD kinahanglan na magpresentar og holistic ug doable nga plano sa pagtap sa surface water sama sa mga suba ingon man water source, lakip na ang desalination.

Sa pagsuwat ning balita, ang MCWD wala pa moluwat og mensahe isip tubag sa mga pamahayag sa CERA. MEL BANAT NEWS