Fishing boat ug 35 ka crew gidakop

CEBU, Philippines — Dili momenus 35 ka mga tripulante ang nasikop sa kapulisan ug sa Bantay Dagat sa lungsod sa Daanbantayan tungod sa matud pa ilegal nga pagpanagat sa kadagatan sa Barangay Carnaza sa maong lungsod.

Sumala sa lokal nga kagamhanan sa Daanbantayan pinaagi sa ilang opisyal nga Facebook page nga Municipality of Daanbantayan, nasikop sila mga alas-6 sa buntag sa Pebrero 14, 2026 sa kadagatan sa Isla de Gato Island sa Barangay Carnaza.

“Further investigation revealed that the fishermen were using active fishing gear (purse seine), a prohibited fishing method within the territorial waters of the Municipality of Daanbantayan,” sumala sa LGU.

Nasakmit gikan sa maong mga mananagat ang 50 ka banyera sa nagkadaiyang isda sama sa tuloy, lunos, burot-burot ug buraw nga gibanabana nagkantidad tanan og P150, 000.

Nakuha pud gikan nila ang ilang commercial fishing vessel nga F/V DB-JOY ug adunay body mark nga DUH-6753 nga nagkantidad og P1.5 milyones; fish net nga ang balor moabot sa P2 milyones; radar-GPS unit nga ang kantidad moabot sa P120, 000 ug telescope nga ang balor anaa sa P5, 000.

Ang mg nasikop lakip na ang panagatan na turnover na sa mga otoridad alang sa dokumentasyon aron magamit sa pagduso og reklamo kalapasan sa Fisheries Laws ug ordinansa sa lungsod.

Sumala sa LGU nalapas nila ang seksyon 86 (unauthorized fishing) ug section 95 (use of active gear in the municipal waters, bays, and other fishery management areas) sa Akta Republika 10654.

Nakalapas pud ang mga dinakpan sa Fisheries Office Administrative Order No. 246-1 series of 2018 nga nagdili sa paggamit og Danish Siene ug modified Danish Siene o hulbot-hulbot nga makaharos sa ilawom ubos sa sa Municipal Ordinance No. 98-02 nga nagdili sa paggamit og hulbot-hulbot ug purse siene isip pamaagi sa panagat sulod sa 15 kilometro nga municipal waters.

Niatong Oktubre 2025, dunay 22 pud ka mga mananagat ang nasikop tungod gihapon sa samang kalapasan. Wala hinuon gibutyag kun ang mga dinakpan pasakaan ba og kaso ubos sa Fishery Code of the Philippines o RA 10654 nga dunay mas bug-at nga silot o kung ang ilaha lang lokal nga ordinansa nga gamay ra og multa nga maoy pirmeng himuon sa mga LGUs ilabi na kun kaila sa mga mayor ang operators sa panagatang malapason. — /IBM (BANAT NEWS)