Multa sa curfew sa siyudad sa Lapu-Lapu giumentohan

CEBU, Philippines — Gipahibalo ni Lapu-Lapu City Mayor Cindi King-Chan nga giusbawan na ang multa sa madakpan nga mga minor de edad sa paglapas sa Curfew Ordinance gikan sa P500 ngadto na sa P1,000.

Gihimo ang pagpausbaw sa multa nunot usab sa namatikdan karong panahona sa grupo sa mga minor nga mangulata sa laing minor de edad nga ilang masugatan panahon sa lawom na nga kagabhion.

Matud pa ni Mayor Chan nga base sa Curfew Ordinance magsugod ang curfew sa mga batan-on sa alas 10 sa gabii hangtod sa alas 5 sa buntag.

Niining mga orasa ang minor de edad nga anaa sa gawas sa ilang panimalay nga walay kuyog nga ginikanan mahimo kining hipuson sa makasugat nga nagpatrolyang mga polis o mga barangay tanod.

Sa unang paglapas kini makabayad og P1,000 sa ika duha P1,500 ug ang ikatulo P1,500 apan mahimo kining ibalhog sa bilanggoan nga dili molapas sa unom ka adlaw.

Una niini dunay laing insidente sa pagpangulata nga gihimo ang grupo sa mga batan-on ngadto sa usa ka tinun-an sa sitio Humay Humay sa Barangay Pusok.

Nalandig sa tambalanan ang biktima ug ang mga suspetado mitahan sa ilang kaugalingon ngadto sa City Social Welfare sa dakbayan. (BANAT NEWS)