Bagyong Basyang nagpabilin ang gikusgon sa hangin

CEBU, Philippines — Bisan pa nga nahimo na og balik nga tropical depression ang bagyong Basyang o adunay international nga pangalan nga Penha nagpabilin gihapon ang gikusgon samtang nag-irog sa Central Visayas.

Base sa alas 5:00 sa hapon kagahapon nga tropical cyclone bulletin sa Philippine Atmospheric Geophysical and Astronomical Services Administration (PAGASA), ang bagyong Basyang ulahing nasigpatan sa Dauis, Bohol diin aduna kini gikusgon sa hangin nga 55 kilometro matag takna ug paghuros nga moabot sa 75 kilometro matag taka, ug central pressure nga 1002 hPa (hectopascal).

Base sa talaan sa PAGASA ang bagyong Basyang nag-irog kini kasadpan habagatan-kasadpan sa gikusgon nga 15 kilometro matag takna.

Giisa ang tropical cyclone wind signal number 1 sa pipila ka dapit sa Luzon sa southern portion sa Occidental Mindoro sa mga lugar sa San Jose, Magsaysay, Rizal, Calintaan, Sablayan;  southern portion sa Oriental Mindoro sa mga lugar sa Mansalay, Bulalacao, Gloria, Pinamalayan, Bansud, Bongabong, Roxas; Romblon sa northern portion sa Palawan ubos sa mga lugar sa Taytay, El Nido, Dumaran, Araceli, Roxas lakip ang Cuyo Islands, Cagayancillo Islands, ug Calamian Islands, ug ang southern portion sa Masbate nga gilangkuban sa Balud, Mandaon, Milagros, Esperanza, Placer, Cawayan.

Samtang sa Visayas, ubos sa signal No.1 ang southern portion sa Eastern Samar sa mga lugar sa Guiuan, Salcedo, Mercedes, Giporlos, Balangiga, Lawaan, Quinapondan, General Macarthur, Hernani, Llorente, Balangkayan, City of Borongan, Maydolong; southern portion sa Samar nga gilangkuban sa Marabut, Basey, Santa Rita, Daram, Talalora, Zumarraga, Villareal, Pinabacdao, Calbiga lakip sa Guimaras, Iloilo, Capiz, Antique, Caluya Islands, Aklan, Biliran, Bohol, Cebu, Negros Occidental, Negros Oriental, Leyte, Southern Leyte ug Siquijor.

Samtang sa Mindanao, ubos gihapon sa signal no.1 ang Dinagat Islands, Surigao del Norte, Agusan del Norte, Misamis Oriental,  northern portion sa Misamis Occidental nga gilangkuban sa Plaridel, Baliangao, Calamba, Lopez Jaena, Sapang Dalaga, Aloran, Oroquieta City, Camiguin ug ang northern portion sa Zamboanga del Norte nga gilangkuban sa Rizal, Sibutad, La Libertad, Dapitan City, Mutia, Piñan, Dipolog City, ug Polanco.

Base sa taho sa PAGASA nga ang mga lugar nga ubos sa signal no.1 makasinati og hinay ngadto sa kasarangan nga huros sa hangin.

Ang bagyong Basyang nag-irog sa habagatang-kasadpan ug posibleng mopadayon padulong sa amihanang kasadpan.  Base sa maong forecast track sa PAGASA posibleng mo land fall ang maong bagyo sa southern portion sa Sugbo o sa Negros Oriental kagahapon sa gabii hangtud karong buntag ug motadlas ngadto sa habagatang bahin sa Panay island.

Gibana-bana nga ang maong bagyo mas mohinay ngadto na lang sa usa ka low pressure area sa mosunod nga 12 oras.

Sa maong bulletin wala pa natala ang paggawas sa bagyo sa Philippine Area of Responsibility. BDB BANAT NEWS