Magtiayon napunggit sa dumptruck

CEBU, Philippines — Patay ang magtiayon human  kalit nga nabanggaan og dumptruck ang nakaparadang trisikol nga ilang gikatulgan diha kilid sa dalan sa Barangay Ibo, Toledo City kagahapon sa kadlawon, Lunes, Pebrero 2, 2026.

Ang mga biktima mao sila si Jeffrey Sapiga Olid ug asawa niini nga si Maggie Olid, parehong nagpuyo sa maong barangay.

Ang nakabangga kanila mao ang Howo dump truck nga dunay kargang balas ug gimaneho ni Revelito Dela Cerna Paraiso, 54, taga Barangay Cantabaco, Toledo City.

Samtang duna say laing Howo dump truck nga naapil sab sa maong disgrasya gimaneho ni Justine Tabiros Hantica, taga Barangay Canlumampao, Toledo City.

Sa imbestigasyon sa Toledo City Police Station base sa pamahayag sa saksi nga si Camillo Apurado,  ang duha ka dump trucks  gikan sa mangalahi nga direksiyon.

Ang dumptruck nga nagkarga og balas gikan sa Sitio Anislag, Barangay Camlumampao padulong kini sa Barangay Tajao, Lungsod sa Pinamungajan.

Samtang ang laing dump truck gikan sa Lungsod sa Pinamungajan ug paingon sa Barangay Canlumampao, Toledo City.

Pag-abot sa nahitaboan, ang dump truck nga gimaneho ni Hantica giingong nisuway og overtake sa gauna nga sakyanan.

Apan nakabantay kini sa dump truck nga nagkarga og balas nga nagpadulong gikan sa opposite direction.

Tungod niini si Hantica kalit nga ni- brake apan tungod sa kakalit niaksyon og baba gang trak ug naigo niini ang kasugat nga dump truck nga nagkarga og balas.

Tungod niini, ang nawagtangan og kontrol kadtong dump truck nga nagkarga’g balas ug  nilapas kini sa pikas nga lane ug diretsong nabangga sa nagparking nga trisikol sa magtiayon. Ang trak mipadayon pa gyud og lahus sa usa ka balay.

Ang magtiayong biktima gidala sa Toledo City General Hospital apan pareho silang gideklarar nga dead-on-arrival.

Ang mga drayber sa duha ka dump trucks gikostudiya na karon sa kapolisan alang sa pagpasaka og mga kaso.

Samtang patay ang usa ka driver sa motorsiklo human madisgrasya sa National Highway, Sitio Malaumon, Tinubdam, Lungsod sa Daanbantayan niadtong Dominggo, Pebrero 1, 2026.  Ang biktima mao si Reymark Mondares Maluya, 26, taga Talisay, Daanbantayan ug driver sa Honda TMX color red.

Sa imbestigasyon sa Daanbantayan Municipal Police Station ang biktima gikan sa Duros Compound sa Lungsod Medellin ug padulong mouli sa ilaha sa Malingin, Daanbantayan.

Pag-abot sa nahitaboan nibaliwliw ang dagan sa motor tungod sa kadagog sa dalan ug hapit mabangga san aka-park sa kilid nga sakyanan apan nawad-an kini og kontrol ug nalamba. Nakaangkon ang biktima og kadaut sa ulo ug kalawasn ug patay na pag-abot sa Daanbantayan District Hospital. (BANAT NEWS)