Karambola, polis patay sa bus

CEBU, Philippines — Nakabsan sa kinabuhi ang usa ka polis nga nadestino sa Regional Highway Patrol Unit(RPHU)-7 human siya nabanggaan og Ceres bus nga nilikay sa karambola sa mga sakyanan diha sa National Highway, Barangay Inuboran, dakbayan sa Naga pasado alas-7 sa buntag kagahapon, Domingo, Pebrero 1, 2026.

Nakalas sa maong hitabo si Police Executive Master Sergeant Antonio Sando, taga dakbayan sa Carcar ug aktibong miyembro sa Philippine National Police ug nadestino sa RHPU-7.

Si PEMS Sando nagmaneho sa Kawasaki EX650E Motorcycle nga iya sa PNP.

Samtang ang mga sakyanan ug motorsiklo nga nalambigit sa karambola mao ang HINO Truck Ceres bus nga gimaneho ni Junrel Villamor Cavalida, 43, taga Bato, Lungsod sa Samboan; Honda City RS CVT Sedan nga gimaneho ni Jhon Phillip Mijares Desamparado, 27, taga dakbayan sa Carcar; Toyota Innova nga gimaneho ni Regan Rodriguez Amarado, 38, taga Coro, Dalaguete; Aerox motorcycle nga gimaneho ni Roy Monleon Malinao Jr., 23, taga Mandaue City ug Mitsubishi G4 Mirage Sedan.

Sa imbestigasyon sa City of Naga Police Station nasuta nga Ceres Bus, Honda City, Toyota Innova ug Mitsubishi Mirage kay nagbiyahe gikan sa Lungsod sa San Fernando ug paingon sa dakbayan sa Naga.

Samtang ang si PEMS Sando ug Aerox nga motorsiklo gikan sa siyudad sa Naga paingon sa Lungsod sa San Fernando.

Pag-abot sa naasoy nga dapit, ang Mitsubishi Mirage giingong kalit nihunong.

Ang Honda City nga nagsunod niini mimenor sab apan nadumbolan gihapon niini ang Mirage sa iyang atubangan.

Ang Toyota Innova nga nagsunod sa Honda City nadumbolan sab ang Honda City.

Apan ang Ceres Bus nga nagsunod sa Toyota Innova milikay aron dili niya ni madumbolan ug niliko sa wala pasulod sa kasugat nga lane, apan didto sab tayming kaayo nga nagdagan si PEMS Sando ug Aerox nga motor nga kadungan sa polis sa pikas lane.

Ang usa sa mga sakyanan nga gituohang mao ang Honda City dunay dash cam sa luyo nga diin nakuha ang pagbangga kaniya sa Toyota Innova ug ang paglihay sa Ceres Bus ug sunod ang kalit nga paghunong niini human sa lagubo nga madungog sa camera.

Tungod sa kakusog sa pagbangga, napasok sa ilawom sa maong bus si PEMS Sando. Dali unta siyang gitabang ug gidala sa South General Hospital apan gideklarar kining dead-on-arrival sa nag-atiman nga doktor.

Ang bus driver gikutodiya sa kapulisan ug giandam ang kaso nga ipasaka batok niini ug ipaubos sab kini sa mandatory alcohol ug chemical testing subay na sa Section 7 sa Republic Act 10586 kun Anti-Drunk and Drugged Driving Act of 2013.

Samtang nag-request sab ang kapulisan sa LTO sa verification sa Mitsubishi Mirage G4. — /IBM (BANAT NEWS)