Sinulog sa Lambusan malampuson

CEBU, Philippines — Walo ka mga barangay nga sakop sa St. Michael the Archangel Parish, Lambusan San Remigio ang nagtigi sa Sinulog sa Parokya 2026 nga gipangulohan sa Kura Paruko Fr. Japhet Geonzon nga gitambongan sa mga opisyal sa lungsod nga gipangulohan usab ni Mayor Mariano Martinez uban sa mga opisyal niini.

Mil kinyentos ka mga tawo ang gibana-bana sa kapulisan nga nisaksi sa maong Sinulog sa parokya nga adunay tema "Diha sa Señor Sto. Niño, Naghiusa Kita."

Ang walo ka mga barangay niapil naglangkob sa Barangay Kinawahan, Busogon, Batad, Lambusan, Luyang, Tacup, Tambongon, Victoria.

Matud pa ni Fr. Geonzon, isip unang parokya nga iyang gialagaran ug unang higayon niyang nagsaulog sa pista sa balaan nga bata dako niyang pasalamat sa tanan mga barangay nga niapil sa maong kalihukan.

Sumala pa ni Geonzon ang kanhi halad lang nahimo na kini karon nga usa ka competition human gisugdan kini sa nanglabay nga mga kaparian.

Gitug-an ni Geozon, ang gihimo nga halad sayaw pagpakita usab kini og pasalamat sa katawhan bisan sa mga pagsuway nga nasugatan.

Si Vice Mayor Alfie Reynes Corominas-Gonzales sa iyang mensahe nipadayag nga dako niyang kalipay nga nakasaksi sa Sinulog sa Lambusan.

Sumala pa sa Vice Mayor ang pagsayaw  dili lang pagpakita sa paglipay-lipay kung dili sa pagpasalamat nga gihatag sa Ginoo sa bag-ong kinabuhi human sa mga trahedya ug kalamidad nga nangagi.

Ang nigawas nga mananaog sa maong Sinulog sa parokya sa Grand Ritual Showdown ang 2nd place gikan sa Barangay Lambusan, 1st place Barangay Victoria ug Champion mao ang Barangay Tacup.

Ang best in festival queen gikan sa Barangay Lambusan. (CEBU NEWS)