RTP sa CCMC gitinguha na ma-institutionalize

CEBU, Philippines — Giaprobahan sa konseho sa Dakbayan sa Sugbo ang ordinansa nga nagtinguha nga i-institutionalize ang Residency Training Program sa Cebu City Medical Center (CCMC) nga usa ka dakong lakang aron mapalig-on ang pampublikong serbisyo sa panglawas, madugangan ang mga doktor sa pampubliko nga tambalanan ug masiguro ang kalidad nga pag-atiman medikal alang sa mga Sugboanon ilabi na ang mga kabus ug walay ikabayad.

Ang ordinansa nga gipanginahanan ni Konsehal Michelle Cellona nga giulohan og “Institutionalizing the Residency Training Program and Creating Positions Necessary thereto at the Cebu City Medical Center (CCMC)” diin subay kini sa mandato sa City Ordinance No. 1508, nga nagmando sa kagamhanan sa pagmentinar ug pag-operate sa CCMC isip usa ka non-profit general hospital ug training facility alang sa medical ug paramedical professionals.

Sa pagkakaron, ang CCMC nag-operate og 225-bed capacity apan gilaoman nga motaas kini ngadto sa 700 beds sulod sa mosunod nga lima ka tuig.

Ug tungod niini, gilaoman usab ang 50 hangtud sa 70 porsyentong pagtaas sa patient admissions, outpatient consultations, ug emergency room cases.

Base sa record sa ospital nisaka ang ihap sa pasyente gikan 2021 hangtud sa 2024 diin nilapas na kini sa 108,000 ka kaso sa internal medicine, pediatrics, surgery, ug obstetrics-gynecology.

Aron matubag ang kakuwang sa mga doktor sa CCMC nalakip sa ordinansa ang paghimo og 70 ka medical officer III positions nga adunay salary grade 21 ubos sa temporary status nga naglakip sa mga resident physicians sa plantilla sa CCMC.

Ang mga posisyon ipanghatag sa mosunod nga mga departamento sama sa internal medicine nga adunay 17 ka doktor, pediatrics nga adunay 20, surgery nga adunay 18 ug obstetrics ug gynecology nga adunay 15.

Ang matag residency program ubos kini sa mga kamandoan sa specialty boards nga adunay tulo hangtud lima ka tuig nga training ug magdepende sa napili nga medical field.

Tumong sa maong ordinansa mao ang pagpasiguro nga ang mga doktor makadawat og standardized ug accredited nga pagbansay-bansay sa dili pa mahimong hingpit nga mga espesyalista.

Tukoron usab ang usa ka Residency Training Committee sa matag departamento aron magdumala sa nahiangay nga curriculum, accreditation, evaluation sa trainees, ug masiguro nga masunod ang giya gikan sa DOH ug specialty society standards. (BANAT NEWS)