35 na ang kompirmadong patay sa binaliw trash slide

CEBU, Philippines — Usa na lang ka tawo ang pabiling gipangita nga gituohang natumpagan sa Materials Recovery Facility (MRF) sa Prime Integrated Waste Solutions, Inc. (PIWSI) sa Barangay Binaliw human sa nahitabo nga trash slide niadtong Enero 8, 2026.

Sa datus nga gipagawas search and rescue team sa Kagamhanan sa Dakbayan sa Sugbo ug sa Management of the Dead and Missing, 35 na ang natalang patay sa maong trahedya.

Sa pagpakighinabi sa Banat News ngadto kang Konsehal David “Dave” Tumulak kinsa tsirman sa Cebu City Disaster Risk Reduction and Management Office (CCDRRMO) siya miingon nga gawas sa datus nga gihatag sa PIWSI, nailhan ang mga biktima base sa gihatag nga timailhan sa mga kabanay.

Ang pinakabata nga biktima nagpangidaron ngadto sa 25 anyos ug ang pinakahamtong nagpangidaron ngadto sa 51 anyos.

Sa pagkakaron, pabiling gipugngan ang mga pangalan sa mga biktima agi og pagrespeto sa nagbangutan nga mga pamilya nga anaa nagpaabot sa gawas sa pasilidad ug mao sab ang motabang og ila sa mga biktima nga napalgan sa rescue team.

Giklaro sab ni Tumulak nga bisan og kapin usa ka semana na ang milabay human ang trahedya apan pabilin nga gihimo ang “search and rescue” ug dili “search and retrieval”.

“Based on the psychosocial intervention that has been given by the psychologists, as of this time, dili pa gyud sila kadawat. And we respect the families. Rest assured we gave assurance to the families that we carefully retrieve or rescue their loved ones inside the ground zero”, suma pa ni Tumulak.

Wala gilimod ni Tumulak nga lisod gyud ang pagtultol sa mga biktima tungod sa kabaga sa mga metal, makinarya ug mga debris ilabi na ang mga basura.

Dugang kakulian ang masinati sa rescue team mao nga mobalik og pagdasok ug mobug-at ang mga basura sa higayon nga mouwan.

Bisan pa og aduna nay boom cranes ug uban pang heavy equipment aron nga mapaspasan ang operasyon apan kinahanglan sab nga mogamit og pala aron nga luwas nga makuha ang mga lawas.

Si Mayor Nestor Archival usab niingon nga dili ipahunong ang operasyon kung dili makit-an ang tanang biktima. “We will not stop until we recover them”, pulong pa ni Archival.

Sa pagkakaron, aduna pay 238 ka rescue personnel ang nagpadayon sa operasyon diin bisan sa hulga sa bagyong Ada, wala gyud kini nihunong tungod kay usa sab kini sa mga malaumon nga mahuman na ang operasyon tungod sa risgo sa panglawas nga ilang giatubang.

Giangkon sab ni Tumulak nga pipila ka mga rescuers ang nipadayag ngadto kaniya nga maapektohan sab sila sa bation sa mga kabanay nga naghuwat tungod kay pipila lang ka metro ang distansya sa pasilidad ug sa huwatanan sa mga kabanay.

“Makita nila ang agony sa families then mao ang naghatag nila og power to search kay naa ang mga pamilya nagtan-aw. They are affected psychologically”, suma pa ni Tumulak.

Tungod niini, adunay walo ka mga psychometrician nga gipadala si Konsehal Michelle Cellona aron nga mohatag og emosyonal ug psychological nga interbensyon sa mga pamilya lakip na ang mga rescuers.

Gawas sa on-standby nga mga psychometrician sa Binaliw, nakigtambayayong sab si Konsehal Cellona sa Department of Health ug Cebu City Health Department Mental Health Team aron nga mobisita sa mga biktima nga anaa pa sa tambalanan aron nga maminaw sa mga kasinatian sa kasakit ug giunsa niini pagsalbar ang kaugalingon gikan sa trahedya.

Sa 18 nga nasamdan, 14 niini ang nakagawas na sa tambalanan ug upat ang nagpabiling giatiman sa mga doctor. (BANAT NEWS)