31 na ang patay
CEBU, Philippines — Nagpadayon ang Search and Rescue Operation sa mga natabunan sa Binaliw landslide sa Dakbayan sa Sugbo hangtud na maugkat ang katapusang lawas sa mga nabiktima sa trahedya.
Kagahabii, basi sa alas 6:37 nga report gikan sa City Disaster Risk Reduction Office, moabot na og 31 ka mga patay’g lawas ang naugkat. Samtang 14 na sa mga nangaangol ang nakagawas na sa tambalanan apan duna pay upat nga padayong nagpaalim.
Duna pay lima nga padayun pang gipangita, samtang ang kataposang naugkat kagabii nga ika-31 padayun pang giila sa mga otoridad kun kinsa.
Si Cebu City Mayor Nestor Archival daan ng namahayag nga magpadayun nga Search and Rescue ang status sa operasyon kay padayun iyang paglaum nga aduna gihapoy makuha nga buhi.
Nahitabo ang pagdahili sa bukid sa basura sa Barangay Binaliw niadtong Enero 8 o kapin usa ka semana ang nakalabay.
Apan tungod sa kapeligroso sa lugar kay posibleng modahili ang uban pang mga basura, ug ang pagsige og bunok sa uwan kinahanglang maghinay-hinay ang operasyon sa mga rescuers.
Una nang miawhag ang mga pamilya nga paspasan ang pag-ugkat sa lawas sa ilang mga minahal sa kinabuhi aron makuha nila nga tibuok pa ang lawas ug mahaya pa nila sa ilang mga pinuy-anan. IBM BANAT NEWS
- Latest
