Punita inyong basura – Archibishop Uy

CEBU, Philippines — Karong nakasugod na ang nobenaryo nga Misa para sa Pista Senyor, nagsugod na og dagsa ang daghang mga deboto kada adlaw ilabi na sa Basilica Minore del Sto. Niño ug sa mga kadalanan palibot niini.

Apan kun asa ang bagang duot sa mga tawo, kanunay gyud nga dunay makitang mga basura nga gipangbilin sa mga nanimba sama sa botelya sa tubig, mga putos sa pagkaon ug uban pa.

Si Cebu Archbishop Abet Uy miapelar karon sa mga deboto nga siguraduhon limpyo ang Cebu City kanunay.

Sa gipagawas niyang mensahe, si Archbishop Uy mipahinumdom sa mga magtutuo nga dili lamang kutob sa pag-ampo ug pagduyog sa prosisyon ang pagpakita og debosyon ug pagdayeg ngadto sa Santo Niño kondili apil sab ang responsableng mga buhat.

“True devotion to the Sto. Niño is shown not only on our lips, but in our actions,” awhag pa niya sa mga deboto nga motambong sa novena Masses, foot processions ug karong umaabot nga fluvial parade.

Mahinungdanon kaayo kini karon nga apelar sa Arsobispo tungod kay ang Cebu City nag-atubang og krisis sa basura tungod sa trahedyang nahitabo sa Binaliw landfill nga nakaingon sa pagpahunong sa operasyon niini.

Rason nga wala nay malabayan og basura ang siyudad ug dunay daghang mga basura nga wala na kolektaha kay walay lugar nga pwedeng mabutangan niini ug mosamot pa gyud kini samtang nagkaduol na ang Pista Senyor ug ang Sinulog.

Giawhag ni Uy ang mga lider sa siyudad apil na ang mga molupyo nga mahimo silang responsible sa ilang mga basura karon nga nag-atubang og suliran ang dakbayan tunga-tunga aning nagsingabot nga selebrasyon.

Gilakbit ni Uy ang bersikulo sa Bibliya nga ang pagka-limpyo usa ka matang sa pagsimba nga maoy gitudlo ni San Pedro sa 1 Corinthians 10:31: “Whatever you do, do it for the glory of God.”

Giawhag niya ang mga deboto nga bitbiton ang ilang mga basura ug ibutang kini sa hustong butangan ug tudloan ang mga bata sa hustong paglabay sa basura—mga pagtulon-an nga matawag ng halad ngadto sa Santo Niño.

“If every devotee picks up even one piece of trash, we will leave our streets cleaner than when we arrived. And that, too, is a beautiful offering to the Santo Niño,”matud pa niya.

“The Book of Genesis teaches us that creation is God’s gift, placed in our hands not to abuse but to protect,” puno pa niya.

Sa pikas bahin, ang kaparian sa basilica miawhag sa mga deboto nga mokuyog sa umaabot nga Walk with Mary sa Enero 15 nga magbutang og karton sa ilang kandila aron masawod ang tinulo niini ug dili mahulog sa karsada.

Kini human nga dunay matud pa moabot 20 ka insidente nga nadakin-as ang mga motorsiklo tungod sa mga tinulo sa kandila diha sa dalan human ang Walk with Jesus nga prosisyon. — /IBM (BANAT NEWS)