Dress code sa basilica ug Sen. Imee gisumsoman sa social media
CEBU, Philippines — Gisumsoman sa social media sa Sugbu ang kabahin na sab sa estriktong pagpatuman og dress code diha sa Basilica Minore del Sto. Niño human sa matud pa mga hulagway ni Senadora Imee Marcos nga nanagkot didto sa sulod nga nagsul-ob lang og blouse nga mubo og bukton.
Daghang netizens ang nikwestyon kun nganong nakasulod siya sa basilica nga estrikto man kaayo ang mga gwardiya bahin sa dress code.
Nagsugod kini human nga ang post sa The Freeman sa mga hulagway sa senador nga nanagkot og kandila nga daling gisaway sa mga netizens. Dunay mga netizens nga gisaway ang senadora apan mas daghan ang nisaway sa kaparian sa simbahan. Tungod ani, si Fr. Jules Van Almerez, OSA, media liaison sa Basilica, subling mipagawas og advisory kagahapon, Enero 10, kabahin sa estriktong pagpasunod sa dress code sa tanang gustong mosulod sa basilica.
“We remind the faithful that our standards of reverence do not change based on the actions of others. Even if some do not follow the dress code, it does not mean we should follow their example. We must remain humble and disciplined in our own conduct inside the church,” tipik sa advisory.
Ang dress code sa simbahan nagdili sa mga sinina sama sa sleeveless tops, spaghetti straps, tube tops, short skirts, shorts, ripped jeans, ug uban pang mga sinina nga dili angay para sa pagsimba.
Si Marcos usa ka deboto sa Senyor Sto. Niño ug kada tuig managkot gyud siya sa basilica matag kapistahan niini, apan karon lang mas nasayo sayo siya kay gikasal man ang anak dinhi sa Cebu Metropolitan Cathedral niadtong adlaw nga Biyernes.
Sumala pa niya, silang mga Marcos ug sa mga kaliwat nila sa Tacloban City mobisita gayud sa Balaang Bata matag tuig apan sa panahon na sa Hubo.
Matud pa niya, ang Pista Senyor ug Sinulog adunay dakong lugar sa iyang kasing-kasing kay kaniadto sakop pa siya sa Kabataang Barangay (nga mao na karon ang Sangguniang Kabataan) usa sila ang nag-unang nakasaksi niini hangtud nga kini nilambo karon. (BANAT NEWS)
- Latest
