Go nangayo og katin-awan sa MCWD

CEBU, Philippines — Nangayo og katin-awan si Cebu City Councilor Harold Kendrick Go kalabot sa contingency plan sa Metropolitan Cebu Water District (MCWD) ug gikwestiyon niini nganong dili 24/7 ang pagtrabaho sa mga contractor human sa pagkuso-kuso sa bagyong Tino sa Dakbayan sa Sugbo.

Gipadayag ni Go nga liboan ka residente ang nag-antos sa kakuwang sa tubig sa ilang mga panimalay ilabi na sa pipila ka mga barangay sama sa Tisa, Binaliw, Bacayan, Pit-os, Busay, Apas, Lahug, ug Camputhaw diin kapin sa usa ka buwan na ang nilabay dihang nakasinati og pagkuso-kuso sa bagyo ang siyudad.

Ang mga residente napugos nga magsalig sa rasyon gikan sa mga water tanker ug mga donasyon gikan sa mga pribadong sektor aron nga makaligo, makaluto ug makalimpiyo.

Aduna pa’y mga residente nga wala pa hingpit nga nakapanghinlo sa lapok nga gibilin sa bagyong Tino diin daghang pamilya nga ang adlaw-adlaw nga kinabuhi karon naglibot lang sa pagpangita og tubig.

Gikataho nga daghang komunidad ang nipadangat sa ilang yangu-ngo kinsa ang kagamhanan sa siyudad, Bureau of Fire Protection, barangay volunteers ug pribadong grupo ang nitubag niini imbes ang MCWD.

Gipahibalo ni Go nga ang iyang buhatan nagkig-alayon na sa pagpalit og electrical contact grease gikan sa Luzon aron makatabang sa pag-restart sa kritikal nga ekipo.

Gawas sa teknikal nga mga problema adunay mas lawom nga kabalaka kabahin sa internal governance sa MCWD nga posibleng nakaapekto sa ilang abilidad sa pagtubag panahon sa emerhensiya gumikan kay walay naglihok nga board nga makapasar og mga resolusyon, mga kontrata ug pag-umol og dagkong lakang aron sa pagsulbad sa sitwasyon.

Ug wala usab kini naaprobahan nga safety plan sulod sa tulo ka tuig diin nagpaila nga kuwang kini sa pagpangandam ug regulatory compliance sa pagresponde sa panahon sa kalamidad. Naglaom si Go nga tambongan  sa mga representante sa MCWD, Local Water Utilities Administration, Watermatic Philippines, JE Hydro, Department of Environment and Natural Resources, ug Cebu City Environment and Natural Resources Office ang pagpatawag niya og  executive session.  BDB BANAT NEWS