Kasalan sa Pantalan gibuhat sa CUPSSA

CEBU, Philippines — Dise-siete ka magtiayon gikan sa komunidad sa pantalan sa Cebu ang opisyal nga nagpakasal karong adlawa atol sa Kasalan sa Pantalan 2025, usa ka mass wedding nga giorganisa sa Cebu United Port Stakeholders Sports Association (CUPSSA) sa pakigtambayayong sa Cebu Port Authority (CPA). Sa ikalima ka tuig na kining gihimo ang Kasalan sa Pantalan  para sa komunidad sa pantalan, lakip na ang mga portador, trabahante, empleyado sa mga kompanya sa barko, ug mga residente nga nagpuyo sulod sa pantalan.

“The main purpose of this event is to strengthen relationships among port stakeholders and promote unity within the port community,” matud pa ni CUPSSA Chairman Engr. Ernesto Boltron Jr. “While we host various activities for stakeholders such as sports events and community programs, Kasalan sa Pantalan focuses on the spiritual side, promoting family values and formalizing relationships among couples,” matud pa ni CUPSSA Board Member Capt. Gimbi Tiongzon.

Walay gastos ang mga magtiayong nagpakasal kay ang asosasyon maoy nagbayad sa lugar, pagkaon, cake, mga panginahanglanon sa programa, ug bayad sa kasal, ang buhaton lang sa mga magtiayon mao ang paghikay sa ilang mga dokumento ug ilang suoton.

Usa sa mga nagpakasal mao ang 18 ka tuig ng nagpuyopuyo nga sila si Marcelo Barcenas (49) ug Karen Peregrino (35). Duna na silay upat ka anak nga nag-edad og 18, 15, 13, ug 10 anyos.  Sulod sa daghang katuigan, ilang nasinati ang kalisdanan sa kinabuhi lakip ang pagkawalay mapuy-anan ug kakulang sa pinansyal.

Sa miaging upat ka tuig, nagpuyo ang pamilya sa dalan, ug sulod sa milabay nga 14 ka tuig hangtod karon nagpuyo sila sulod sa Chinese Cemetery sa Cebu City.  “Lipay ko nga nagminyo na mi,” matud pa ni Marcelo ug Caren.  Si Marcelo usa ka person with disability (PWD) tungod sa polio sukad pagkabata ug kaniadto nagtrabaho isip drayber sa traysikol palibot sa pantalan.  Karon nanginabuhi siya isip usa ka paid parking attendant sa gawas sa Roble Shipping Lines sa pier sa Cebu City.

“We pray that God will always guide your marriage. May your relationship be centered on prayer, faith, and trust in the Lord,” matud pa CPA Commissioner Emery “Joy” Roble, usa sa mga principal sponsors sa mga newly-wedded couple.  Gipasabot ni Roble nga ang kalampusan sa kalihokan resulta sa panagbinuligay sa mga tig-organisa, sponsors, ug stakeholders.

Si Jonathan Fernandez, Presidente sa Oriental Port and Allied Services Corporation (OPASCOR), nag-awhag usab sa mga bag-ong kasal nga ampingan ang ilang mga saad, magpadayon sa pagtahod sa usa’g usa, ug tukuron ang ilang pamilya sa gugma ug panagtinabangay.

Sumala kang CPA General Manager Francisco Comendador III, ang ideya sa Kasalan sa Pantalan una nga natawo atol sa anibersaryo sa CPA niadtong Hunyo pinaagi sa kalihokan nga Sikat sa Pantalan.

“This activity does not only focus on the community, we start with the family. The family is the foundation of society. That is why we work for the improvement of families in the port community,” matud pa ni Comendador.