Hagit sa DTI ug Malacañang

Daghan ang nagbagutbot sa gibutyag sa Department of Trade and Industry (DTI) nga igo na ang P500 pang- Noche Buena sa usa ka pamilya nga dunay upat ka miyembro.

Matud ni DTI Secretary Cristina Roque nga sigun sa ilang listahan, makapalit na og Christmas ham, spaghetti, fruit salad, ug macaroni salad ang maong kantidad nga mahimong saw-an sa pamilya alang sa Noche Buena pagsugat sa Pasko.

Daghan sa mga magbabalaod ang miingon nga “unrealistic” ang maong kantidad tungod sa kamahal na sa mga palitonon.

Apan taliwa sa kadaghan sa mga nanaway ug wala motuo sa ilang pamahayag, miinsister ang DTI nga paigo ra gyud ang maong kantidad ug gisuportahan sab ni sa Malacañang.

Ambot nganong labihan gyud ka hilig ning atong gobyerno nga tabonan ang realidad. Ambot hangtod asa kutob ilang pagoryo-goryo  ug moangkon na sa kamatuoran nga wa nay barato sa mga palitonon sa pagkakaron.

Ang pagdeklarar sa DTI nga igo na ang P500 pang-Noche Buena sa usa ka gamay’ng pamilya  nagpakita nga nakaminus ang kagamhanan sa mga kabus. Gisusi sa The Freeman ang giingon sa DTI nga Christmas ham, spaghetti, macaroni ug fruit cocktail alang sa fruit salad  apan sobra sa katunga ang labaw sa presyo nga gitug-an sa DTI.

Sigun sa pakisusi sa The Freeman nga moabot og sobra ssa usa ka libo ang presyo sa tanan nga gihisgotan sa DTI wala pay labot ang ubang mga sangkap nga mahimong isagol aron mas lamian ang pagkaon.

Kuwang nalang ingnon sa DTI nga angayang makontento  nalang ang mga kabus sa mumho samtang ang mga opisyal sa kagamhanan nagpahimulos sa buhis sa katawhan.

Samtang ang mga pobre ulog-ulogan sa DTI nga igo na ang P500 pang-Noche Buena, binilyon ka pisos sa buhis sa katawhan ang gikawat sa mga opisyal sa gobiyerno.

Samtang ang mga kabus nga magbubuhis  nagkapuliki unsaon pagbudget aron maigo ang ilang dyutay nga nahabilin sa ilang kita, ang mga politiko ug ilang pamilya nagpatuyang sa ilang luho. 

Ato kahang hagiton ang taga DTI ug ang tanang mga opisyal sa Malacañang nga suwayan ang magsugat og Pasko nga P500 ray budget alang sa Noche Buena.