P850 milyong illegal drugs nasakmit

CEBU, Philippines — Atol sa Monday Flag Raising Ceremony sa Camp Sergio Osmeña Sr., si Police Regional Office(PRO)-7 Regional Director Police Brigadier General Redrico Maranan mipresentar sa resulta sa operasyon gikan sa Enero hangtod sa November 27, 2025.

“These achievements are the product of strategic, intelligence-driven operations, disciplined execution, and strong community cooperation," sigon ni Maranan.

Ang anti illegal drug campaign sa kapolisan sa rehiyon niresulta sa pagkasakmit sa 124.2 kilograms sa gituohang shabu nga nagkantidad og P849,204,889.60 sa 7,963 ka operasyon sa kapulisan.  Nakasikop ang PRO-7 og 9,267 drug personalities apil ang 309 high value targets,  2,983 street-level individuals, ug 5,975 newly identified personalities.

Apil sa mga nasakmit ang 2,612 grams nga marijuana leaves, 14,421 marijuana plants ug marijuana sticks, 250 grams nga cocaine ug 60 ecstasy tablets.

Nakatala sab ang PRO-7 og 99.70 percent conviction rate sa drug cases gikan sa January 1 hantod sa November 26, 2025, resulta kini matud pa sa metikulosong imbestigasyon ug istriktong pagsunod sa legal procedures.

Sa 141 ka kaso nga gisang-at, 137 ang niresulta sa convictions.

“Each conviction strengthens public confidence and proves that our operations are credible, disciplined, and justice-driven," ni Maranan pa.

Gihimug-atan ni Maranan nga ang maong accomplishments nagpakita sa dedikasyon, integridad ug kolaborasyon tali sa kapulisan ug katawhan sa Central Visayas.

“These results are not just operational wins—they are our commitments kept to the communities we serve," matud ni Maranan.

Gipasalig sa PRO-7 nga magpadayon sila sa ilahang intelligence-led disciplined approach sa policing, pagpanuguro nga ang Central Visayas magpabiling luwas ug secure region alang sa tanan.

Sa pikas bahin, naluwas sa kapulisan sa Pari-an Police Station 1 Cebu City Police Office ang usa ka 17-anyos nga lalake human kini nakuhaan og illegal nga drugas diha sa M. Lazarte Street, Barangay Parian, Cebu City niadtong Lunes sa gabii, Disyembre 1, 2025.

Ang na-rescue nga menor de edad taga Barangay Poblacion, Dakbayan sa Lapu-Lapu nga giingong nakit-ang naghupot og usa ka gamay nga sachet nga gituohang shabu nga nagkantidad og P272.

Gitugyan ngadto sa DSWD ang menor de edad. IBM BANAT NEWS