Ngalan sa "killer" nalitok pa sa biktima

CEBU, Philippines — Suspek sa pagpatay nailhan ug nadakpan human ang iyang biktima nga gituohan niyang namatay dayun, nakatug-an pa sa iyang pangalan ayha nabugtoan sa kinabuhi.

Ang pagpamusil nahitabo sa Purok Balanghoy, Barangay Gin-ob, Siyudad sa Lapu-Lapu nga nahitabo alas 4 pasado ang takna sa miaging Sabado sa kaadlawon, Nobyimbre 22, 2025.

Nadakpan dayun sa hot pursuit operation sa kapolisan sa Lapu-Lapu City Police Office (LCPO) ang 48 anyos nga lalaki nga taga Purok Ube sa Barangay Gun-ob, Siyudad sa Lapu-Lapu.

Ang biktima nga 38 anyos nga lalaki napalgan sa iyang silingan nga nagkadugo ug buhi pa. Matud pa nga nakasulti pa kini sa pangalan sa nagpusil niya nga giingon nga iyang gikaaway kaniadto.

Dali nilang gidala ang biktima sa Lapu-Lapu City District Hospital ang biktima apan paglabay sa pipila ka oras nakabsan gayud kini sa iyang kinabuhi.

Si Police Colonel Antonieto Cañete, Officer -In- Charge (OIC) sa LCPO dali nga mimando sa pagpahigayon og hot pursuit operation batok sa maong suspetsado hinungdan sa pagkasikop niini. — /IBM (BANAT NEWS)