Cebu City mopatuman og No Build Zone

CEBU, Philippines — Nahukman ni Cebu City Mayor Nestor Archival, Sr. nga ipatuman ang “No Build Zones” sa mga dapit nga duol sa kadagatan ug kasapaan sa siyudad human nasinati ang grabeng kadaot ug adunay 33 ka kinabuhi nga nakalas ug unom ang pabiling missing tungod sa bagyong Tino.

Gibana-bana sa mayor nga anaa sa 15,000 ka panimalay duol sa sapa ug dagat ang nabanlas tungod sa pagkuso-kuso sa bagyo diin gihulagway niya nga anaa na gyud kini sa “danger zones” diin risgo sa posibleng lunop kong mobunok na usab ang uwan.

Gibutyag sa mayor nga adunay mga residente sa Barangay Bacayan ang buot nga mobalik sa ilang tungkaran duol sa sapa apan gimandoan na niya ang Prevention Restoration Order Beautification Enhancement (PROBE) nga alihan og dili na patukoran bisan og poste aron malikayan ang dugang disgrasya.

Matud ni Archival nga adunay duha ka subdivision sa amihanang bahin sa Sugbo ang maapektohan sa No Build Zone ug posible nga masilotan ang mga developer tungod sa kalapasan.

Gipadayag ni Archival nga dili lang sa Bacayan ang ipatuman ang No Build Zone apan lakip usab diha sa mga sapa dinhi sa ubos nga bahin sa siyudad sama sa Pahina Central.

Pangitaan og paagi ni Archival nga adunay kapahilunaan ang mga residente nga maapektohan sa No Build Zone.

Nangayo na usab og tabang si Archival ngadto kang Presidente Ferdinand “Bongbong” Marcos, Jr., Senador Francis “Kiko” Pangilinan ug sa Department of Human Settlements and Urban Development aron adunay pundo sa pagpatukod og edipisyo alang sa mga apektadong pamilya.

Sa pagkakaron, liboan ka mga pamilya ang nagpasilong sa mga evacuation centers ug sa mga tunghaan sa siyudad apan alang kang Archival mas kinahanglan nga adunay permanenting puy-anan ang mga Sugboanon nga layo sa peligro sa umaabot nga mga katalagman.