Mandaue City wala pay kompirmadong nakalas   

CEBU, Philippines — Gikonsiderar sa Mandaue City nga malampuson ang gihimo nilang preemptive evacuation nunot sa pag-igo sa bagyong Tino niadtong Nobiyembre 4, 2025.

Kini human nila nasuta nga wala pay bisan usa nga Mandauehanon nga nakompirmar nga nakalas. Si City Administrator Atty. Gonzalo Sally" Malig-on miingon nga base sa pakisusi sa kapolisan ug City Disaster Risk Reduction and Management Office (CDRRMO) ilang nasuta nga kadtong 14 nga nakaplagang patay sa ilang dakbayan, ang 12 ani mga taga Cebu City, ang duha wala pa mailhi.

Samtang dunay usa nga taga Barangay Tingob nga missing pa.  Si Malig-on miingon nga dinhi ilang nakita nga nagmalampuson ang ilang preparasyon nga gimando Mayor Thadeo Jovito "Jonkie" Ouano aron mamenusan ang impact sa bagyo. Sa pikas bahin, ang kagamhanan sa Dakbayan sa Talisay mideklarar nga nahuman na ang search and rescue ug retrieval operation bisan padayun ang pagpangita sa mga pito ka na-missing.

Kini tungod kay kinahanglan na nilang himuon ang clearing operation aron mabalik na sa normal ang tanan sumala pa ni Alvin Santillana, ang pangu sa Talisay City Disaster Risk Reduction and Management Office.

Ang grabeng naapektahan mao ang Jaclupan, Campo 4, Lagtang, Lawaan 2, Lawaan 3, Tabunok, San Isidro, Dumlog, Biasong ug adunay parte sa Mohon.

Sumala pa ni Santillana, sa maong mga barangay upat ang grabeng naapektohan nga naglangkob sa Lawaan 3, Lawaan 2, Dumlog ug Biasong tungod kay duol kini sa Mananga River nga nibanlas sa mga kabalayan. (BANAT NEWS)