Package 1 sa CBRT gikatakdang ilusad

CEBU, Philippines — Ilusad na ngadto sa kinabag-an ang package 1 sa Cebu Bus Rapid Transit (CBRT) karong Nobiyembre 5, 2025 diin ang maong kalihokan tambongan ni Presidente Ferdinand “Bongbong” Marcos, Jr.

Ipahigayon ang inugurasyon diha sa Osmeña Boulevard Station uban sa opisyales gikan sa Department of Transportation (DOTr) nga pinangulohan ni Transportation Secretary Giovanni "Banoy" Lopez ug opisyales sa kagamhanan sa Dakbayan sa Sugbo nga ginangulohan ni Mayor Nestor Archival, Sr..

Lakip sa motambong ang mga representante sa Cebu Interim Bus Service (CIBUS), Bureau of Fire Protection Regional Office-7, Cebu City Transportation Office (CCTO) ug ubang stakeholders nga kabahin sa kalamboan sa proyekto.

Ang kalihokan nagpasabot sa pagkompleto sa unang hugna sa proyekto nga buksan sa publiko nga manukad gikan sa South Bus Terminal sa Natalio Bacalso Avenue paingon sa Osmeña Boulevard.  Isip hingpit nga pagpangamdam alang sa dakong kalihokan isirado ang dedicated BRT lanes sa Osmeña Boulevard sugod karong Nobiyembre 3, 2025 aron ma-setup ug masiguro ang siguridad ug ang CCTO mao ang gitahasan nga mo mando sa dagan sa trapiko pinangulohan ni Raquel Arce.

Nipasalig si Archival nga mopahigayon og laing route inspection sa dili pa ang adlaw sa inugurasyon aron masuta nga nahuman na ang iyang mga gipakorehian nga wala kapasar nga trabaho kabahin sa estraktural ug elektrikal nga aspeto sa CBRT.

Ang CBRT mao ang flagship partnership project tali sa DOTr ug kagamhanan sa Dakbayan sa Sugbo nga gipanglantawan nga makahatag og moderno ug episyente nga bus-based public transport system aron mas daghan pa ang mga Sugbuanon nga makasinati og paspas, limpiyo, ug hapsay nga biyahe matag adlaw. (BANAT NEWS)